ஈரோட்டில் மாவட்ட கபடி போட்டி கொடிவேரி அணி சாம்பியன் பட்டம்

ஈரோடு

ஈரோட்டில் நடந்த மாவட்ட அளவிலான கபடி போட்டியில் கொடிவேரி அணி சாம்பியன் பட்டத்தை வென்றது.

தமிழ்நாடு மாநில அமெச்சூர் கபடி கழகம் சார்பில் ஈரோடு மாவட்ட அளவிலான ஆண்கள் மற்றும் பெண்கள் சாம்பியன்ஷிப் கபடி போட்டி ஈரோடு வ.உ.சி. பூங்கா விளையாட்டு மைதானத்தில் நேற்று முன்தினம் தொடங்கியது. இந்த போட்டியில் ஈரோடு மாவட்டத்தில் பல்வேறு இடங்களில் இருந்து 175 ஆண்கள் அணிகளும், 10 பெண்கள் அணிகளும் பங்கேற்று விளையாடின.

இந்த போட்டிகளில் வெற்றி பெற்றவர்களுக்கான பரிசளிப்பு விழா நேற்று நடந்தது. விழாவில் தமிழக வீட்டுவசதித்துறை அமைச்சர் சு.முத்துசாமி கலந்துகொண்டு வெற்றி பெற்ற அணிகளுக்கு பரிசுகளை வழங்கி பாராட்டினார். இதில் பெண்கள் பிரிவில் முதல் இடம் பெற்ற கொடிவேரி டிரீம் ஸ்டார் அணிக்கு ரூ.5 ஆயிரத்து 555 மற்றும் பரிசுக்கோப்பை, 2-வது இடம் பெற்ற கோபி சாரதா கல்லூரி அணிக்கு ரூ.3 ஆயிரத்து 333 மற்றும் பரிசுக்கோப்பை, 3-வது இடம் பிடித்த பிரம்மதேசம் சக்தி பிரதர்ஸ் அணிக்கு ரூ.1,111 மற்றும் பரிசுக்கோப்பை, 4-வது இடம் பெற்ற கருங்கல்பாளையம் சுரேந்தர் மெமோரியல் அணிக்கு ரூ.1,111 மற்றும் பரிசுக்கோப்பை வழங்கப்பட்டன.

இதேபோல் ஆண்கள் பிரிவுக்கான இறுதி போட்டிகள் இரவு வரை நடந்தது. இந்த போட்டியிலும் முதல் இடம் பெற்ற அணிக்கு ரூ.11 ஆயிரத்து 111 மற்றும் பரிசுக்கோப்பை, 2-வது இடம் பெற்ற அணிக்கு ரூ.7 ஆயிரத்து 777 மற்றும் பரிசுக்கோப்பை, 3-வது இடம் மற்றும் 4-ம் இடம் பெற்ற அணிகளுக்கு தலா ரூ.4 ஆயிரத்து 444 மற்றும் பரிசுக்கோப்பைகள் வழங்கப்பட்டன.

இதில் மாநகராட்சி மேயர் நாகரத்தினம், ஈரோடு மாவட்ட கால்பந்து கழக தலைவர் பாலசுப்பிரமணி, தேசிய கபடி வீரரும், ஓய்வுபெற்ற வருமானவரித்துறை அதிகாரியுமான சுப்பிரமணியம் உள்பட பலர் கலந்து கொண்டார்கள்.