கருங்கல் அருகே குளத்தில் மூழ்கி டிரைவர் பலி

கருங்கல்:

கருங்கல் அருகே உள்ள உதயமார்த்தாண்டம் மாத்திரவிளையை சேர்ந்தவர் சந்தோஷ் குமார் (வயது40), லோடு ஆட்டோ டிரைவர். இவருக்கு மனைவியும் ஒரு மகனும் உள்ளனர். சந்தோஷ்குமாருக்கு மது குடிக்கும் பழக்கம் உண்டு என கூறப்படுகிறது. நேற்று முன்தினம் இரவு மது போதையில் அருகில் உள்ள மங்காரகுளத்தில் குளிக்க சென்றார். அவர் படித்துறையில் இறங்கி குளிக்க முயன்ற போது எதிர்பாராத விதமாக தண்ணீரில் தவறி விழுந்தார். இதில் தண்ணீரில் மூழ்கி இறந்ததாக தெரிகிறது. இதற்கிடையே சந்தோஷ்குமார் நீண்ட நேரமாக வீடு திரும்பாததால் அவரை தேடி உறவினர்கள் குளத்திற்கு சென்றனர். அப்போது, அவர் குளத்தில் பிணமாக கிடப்பதை கண்டு அதிர்ச்சி அடைந்தனர்.

இதுகுறித்து தகவல் அறிந்த கருங்கல் போலீசார் சம்பவ இடத்துக்கு வந்து பிணத்தை கைப்பற்றி ஆசாரிபள்ளம் அரசு மருத்துவமனைக்கு அனுப்பி வைத்தனர். மேலும் போலீசார் வழக்குப்பதிவு செய்து விசாரணை நடத்தி வருகின்றனர்.

---