தொடர் விடுமுறை எதிரொலி: நாமக்கல் பஸ் நிலையத்தில் அலைமோதிய பயணிகள் கூட்டம்

நாமக்கல்:

தமிழகத்தில் இன்று (வியாழன்) தமிழ் புத்தாண்டு, நாளை (வெள்ளிக்கிழமை) புனித வெள்ளி, நாளை மறுநாள் (சனிக்கிழமை) மற்றும் ஞாயிறு என தொடர்ந்து 4 நாட்களுக்கு அரசு அலுவலகம், பள்ளி, கல்லூரிகளுக்கு விடுமுறை அளிக்கப்பட்டு உள்ளது.

எனவே பள்ளி, கல்லூரிகளில் படிக்கும் மாணவ, மாணவிகள் மற்றும் அரசு, தனியார் நிறுவன பணியாளர்கள் தங்கள் சொந்த ஊருக்கு நேற்று புறப்பட்டனர். இதையடுத்து நாமக்கல் பஸ் நிலையத்தில் பயணிகள் கூட்டம் அலைமோதியது.

தமிழ் புத்தாண்டு மற்றும் தொடர் விடுமுறையையொட்டி தமிழ்நாடு அரசு போக்குவரத்து கழகம் சார்பில் கோவை, ஈரோடு, திருச்சி, சேலம், சென்னை மற்றும் விழுப்புரம் உள்ளிட்ட பல்வேறு பகுதிகளுக்கு சிறப்பு பஸ்கள் இயக்கப்பட்டு வருவது குறிப்பிடத்தக்கது.