பெங்களூருவுக்கு இருசக்கர வாகனங்களில் ரேஷன் அரிசி கடத்திய 3 பேர் கைது

ஓசூர்:

கிருஷ்ணகிரி மாவட்ட உணவுப்பொருள் கடத்தல் தடுப்பு பிரிவு போலீஸ் இன்ஸ்பெக்டர் வளர்மதி தலைமையில் போலீசார், ஓசூர் ரிங்ரோடு, பாரதிதாசன் நகர் பகுதியில் நேற்று வாகன சோதனையில் ஈடுபட்டனர். அப்போது, அந்த வழியாக மொபட்டில் வந்த தேன்கனிக்கோட்டையை சேர்ந்த அர்ஜூன் (வயது 21) என்பவரை நிறுத்தி சோதனை செய்தனர். அதில் 1,050 கிலோ ரேஷன் அரிசி பெங்களூருவுக்கு கடத்தியது தெரியவந்தது. அதேபோல், ஓசூர் பகுதியை சேர்ந்த அப்பாஸ் (24), ஓசூர் ராம்நகர் பகுதியை சேர்ந்த பழனிமுருகன் (29) ஆகியோர் இருசக்கர வாகனத்தில் ரேஷன் அரிசியை பெங்களூருவுக்கு கடத்தி சென்றது தெரியவந்தது. இதையடுத்து அவர்கள் 3 பேரையும் போலீசார் கைது செய்தனர். மேலும் ரேஷன் அரிசி, இருசக்கர வாகனங்களை போலீசார் பறிமுதல் செய்தனர்.