எஸ்.எஸ்.எல்.சி. தேர்வு எழுதுவதற்காக 3 மாணவர்கள் சென்ற மோட்டார் சைக்கிள் தடுப்புசுவரில் மோதல்; ஒருவர் சாவு

துமகூரு: துமகூரு அருகே எஸ்.எஸ்.எல்.சி. தேர்வு எழுதுவதற்காக 3 மாணவர்கள் சென்ற மோட்டார் சைக்கிள் தடுப்புசுவரில் மோதி விபத்துக்குள்ளானது. இதில் ஒரு மாணவர் பலியானார். மேலும் 2 பேர் படுகாயமடைந்தனர். 

துமகூரு மாவட்டம் குனிகல் தாலுகா சென்னகரா கிராமத்தை சேர்ந்தவர் நவீன் (வயது 16). இவர் பள்ளி ஒன்றில் எஸ்.எஸ்.எல்.சி. படித்து வந்தார். அதே பள்ளியில் தர்ஷன், சரத் ஆகிய மாணவர்களும் எஸ்.எஸ்.எல்.சி. படித்து வருகின்றனர். இவர்கள் 3 பேரும் நண்பர்கள் ஆவார்கள். நேற்று எஸ்.எஸ்.எல்.சி.க்கு கணித தேர்வு நடைபெற்றது.

இந்த தேர்வை எழுதுவதற்காக மாணவர்களான நவீன், தர்ஷன், சரத் ஆகிய 3 பேரும் கிராமத்தில் இருந்து பள்ளிக்கு புறப்பட்டார்கள். ஆனால் தேர்வுக்கு செல்ல தாமதமாகி விட்டதால் 3 பேரும் ஒரே மோட்டார் சைக்கிளில் பள்ளிக்கு செல்ல முடிவு செய்தார்கள். அதன்படி, ஒரே மோட்டார் சைக்கிளில் 3 மாணவர்களும் புறப்பட்டு சென்றனர்.

அம்ருத்தூர் போலீஸ் எல்லைக்கு உட்பட்ட பகுதியில் 3 பேரும் சென்று கொண்டு இருந்த போது திடீரென்று கட்டுப்பாட்டை இழந்த மோட்டார் சைக்கிள், சாலையோர தடுப்பு சுவரில் மோதியது. இதனால் 3 மாணவர்களும் தூக்கி வீசப்பட்டார்கள். இதில், தலையில் பலத்தகாயம் அடைந்த நவீன் பரிதாபமாக இறந்து விட்டார். படுகாயம் அடைந்த தர்ஷன், சரத் ஆஸ்பத்திரியில் அனுமதிக்கப்பட்டு சிகிச்சை பெற்று வருகிறார்கள்.

ஒரே மோட்டார் சைக்கிளில் 3 பேர் சென்றதால், அவர்களது கட்டுப்பாட்டை இழந்து தடுப்பு சுவரில் மோதியது தெரியவந்துள்ளது. இதுகுறித்து அம்ருத்தூர் போலீசார் வழக்குப்பதிவு செய்து விசாரணை நடத்தி வருகின்றனர்.