சத்தியமங்கலம் அருகே ஆசிரியர் வீட்டின் பூட்டை உடைத்து நகை- பணம் திருட்டு

சத்தியமங்கலம்

சத்தியமங்கலம் அருகே ஆசிரியர் வீட்டின் பூட்டை உடைத்து நகை, பணத்தை திருடிச்சென்ற மர்மநபர்களை போலீசார் வலைவீசி தேடி வருகிறார்கள்.

இதுகுறித்து போலீஸ் தரப்பில் கூறப்படுவதாவது:-

சத்தியமங்கலம் அருகே உள்ள பண்ணாரியம்மன் நகரை சேர்ந்தவர் ஆறுமுகம் (வயது 37). ஆசிரியர். இவர் சம்பவத்தன்று வீட்டை பூட்டிவிட்டு், உடல்நலக்குறைவு ஏற்பட்ட மாமனாரை அழைத்துக்கொண்டு மனைவியுடன் கோவைக்கு சென்றார். 2 நாட்களுக்கு பிறகு வீட்டுக்கு திரும்பி வந்தார். அப்போது வீட்டு கதவின் பூட்டு உடைக்கப்பட்டு திறந்து கிடந்தது.

இதனால் அதிர்ச்சி அடைந்த அவர் உள்ளே சென்று பார்த்தபோது அங்கிருந்த பீரோவும் உடைக்கப்பட்டு திறந்து கிடந்தது. பீரோவை பார்த்தபோது அதிலுள்ள துணிகள், பத்திரங்கள் சிதறி கிடந்தது. தங்க சங்கிலி, ஜிமிக்கி, மோதிரம் என 6 பவுன் நகையை காணவில்லை. மேலும் ரூ.33 ஆயிரம், வெள்ளி டம்ளர், கடிகாரம் ஆகியனவும் திருட்டுப்போய் இருந்தது.

வீட்டில் ஆள் இல்லாததை தெரிந்து கொண்ட மர்மநபர்கள் வீட்டு் கதவின் பூட்டை உடைத்து உள்ளே புகுந்து பீரோவை உடைத்து அதிலிருந்த பணம், நகையை திருடிவிட்டு தப்பிச் சென்றது  தெரியவந்தது.

இதுகுறித்து ஆறுமுகம் கொடுத்த புகாரின் பேரில் சத்தியமங்கலம் போலீசார் வழக்குப்பதிவு செய்து நகையை திருடிவிட்டு தப்பிச் சென்ற மர்மநபர்களை வலைவீசி தேடி வருகிறார்கள்.