சுங்கான்கடையில் மோட்டார் சைக்கிளில் கடத்திய 110 கிலோ ரேஷன் அரிசி பறிமுதல்

நாகர்கோவில், 

சுங்கான்கடையில் மோட்டார் சைக்கிளில் கடத்திய 110 கிலோ ரேஷன் அரிசி பறிமுதல் செய்யப்பட்டது.

குமரி மாவட்ட உணவு கடத்தல் தடுப்பு பிரிவு போலீஸ் சப்-இன்ஸ்பெக்டர் கணேசன் மற்றும் போலீசார் நேற்று நாகர்கோவில் சுங்கான்கடை பகுதியில் ரோந்து சென்றனர். அப்போது அந்த வழியாக மோட்டார் சைக்கிளில் 2 மூடைகளுடன் ஒருவர் வேகமாக வந்தார். போலீசார் அவரை தடுத்து நிறுத்தி மூடைகளை சோதனை செய்த போது 110 கிலோ ரேஷன் அரிசி இருந்தது தெரியவந்தது. விசாரணையில் இந்த ரேஷன் அரிசியை கேரளாவுக்கு கடத்த முயன்றது கண்டுபிடிக்கப்பட்டது. இதையடுத்து அரிசியை மோட்டார் சைக்கிளுடன் பறிமுதல் செய்து, மோட்டார் சைக்கிளை ஓட்டி வந்த கேரள மாநிலம் பாறசாலையை சேர்ந்த மாயின் (வயது 35) என்பவரை போலீசார் கைது செய்தனர்.