முன்னாள் மாணவர்கள் சந்திப்பு

திண்டுக்கல்:

திண்டுக்கல் எம்.எஸ்.பி. பள்ளியில் 1978-ம் ஆண்டு எஸ்.எஸ்.எல்.சி. படித்த மாணவர்கள், அவர்களுக்கு கல்வி கற்பித்த ஆசிரியர்கள் சந்திப்பு நிகழ்ச்சி பள்ளி வளாகத்தில் நடந்தது. இதற்கு பள்ளி தாளாளர் முருகேசன் தலைமை தாங்கி, முன்னாள் மாணவர்கள், ஆசிரியர்களை வாழ்த்தி பேசினார்.

 பள்ளியில் 11 ஆண்டுகள் படித்து எஸ்.எஸ்.எல்.சி. தேர்வு எழுதும் நடைமுறை இருந்த காலகட்டத்தில் எம்.எஸ்.பி. பள்ளியில் படித்த 100 மாணவர்கள், அவர்களுக்கு கல்வி கற்பித்த 25 ஆசிரியர்கள் இந்த நிகழ்ச்சியில் கலந்துகொண்டு தங்களின் பள்ளிக்கால பசுமையான நினைவுகளை பேசி மகிழ்ந்தனர்.

அப்போது மாணவர் பருவத்தில் தங்களுக்கு ஆசிரியர்கள் மூலம் கிடைத்த சரியான வழிகாட்டுதல்களால் தான் தங்களால் அரசு பள்ளி தலைமை ஆசிரியர்களாகவும், பள்ளி தாளாளர்களாகவும் மாறி சாதனை படைக்க முடிந்தது என்று கூறி தங்களுக்கு கல்வி கற்பித்த ஆசிரியர்களின் கால்களில் விழுந்து முன்னாள் மாணவர்கள் ஆசி பெற்றனர். மேலும் அவர்களுக்கு நினைவு பரிசும் வழங்கினர்.

அதேபோல் ஆசிரியர் ஒருவர் முன்னாள் மாணவர்களுக்கு திருக்குறள் புத்தகங்களை பரிசாக வழங்கினார். பின்னர் அனைவரும் ஒன்றாக அமர்ந்து புகைப்படம் எடுத்துக்கொண்டனர். 44 ஆண்டுகளுக்கு முன்பு சிறுவர்களாக இருந்தவர்களில் பலர் தங்களை போல் ஆசிரியர்களாக பணியாற்றியிருப்பதை அறிந்ததும் அவர்களுக்கு கல்வி கற்பித்த ஆசிரியர்கள் மகிழ்ச்சியடைந்தனர்.

மேலும் தங்களின் உழைப்பு வீண் போகவில்லை என்று கூறி முன்னாள் மாணவர்களை தட்டிக்கொடுத்து ஆனந்த கண்ணீர் விட்டனர். அது பார்ப்பவர்களை நெகிழ்ச்சியடைய வைத்தது. நிகழ்ச்சிக்கான ஏற்பாடுகளை பள்ளி தலைமை ஆசிரியர் பால்பாண்டி மற்றும் முன்னாள் மாணவர்கள் செய்திருந்தனர்.