தண்டவாளத்தை கடக்க முயன்ற தொழிலாளி ரெயில் மோதி பலி
தண்டவாளத்தை கடக்க முயன்ற தொழிலாளி ரெயில் மோதி பலியானார்.
ஜோலார்பேட்டை
திருப்பத்தூர் மாவட்டம் வாணியம்பாடியை அடுத்த சிக்கனங்குப்பம் பகுதியை சேர்ந்தவர் மோகன் (வயது 37), கட்டிட தொழிலாளி. இவருக்கு சரளா என்ற மனைவியும், 2 மகள்களும், ஒரு மகனும் உள்ளனர்.
இந்த நிலையில் மோகன் கட்டிட வேலை செய்வதற்காக குடியாத்தம் அருகே உள்ள மேல்பட்டி-வளத்தூர் ரெயில் நிலையங்களுக்கு இடையே தண்டவாளத்தை கடக்க முயன்றார். அப்போது ஜோலார்பேட்டை ரெயில் நிலையத்தில் இருந்து சென்னை நோக்கி சென்ற ரெயிலில் அடிபட்டு பரிதாபமாக உயிரிழந்தார்.
இதுகுறித்து தகவல் அறிந்ததும் ஜோலார்பேட்டை ரெயில்வே போலீஸ் சப்-இன்ஸ்பெக்டர் ஜெயக்குமார் மற்றும் போலீசார் சம்பவ இடத்துக்கு சென்று உடலை கைப்பற்றி பிரேத பரிசோதனைக்காக குடியாத்தம் அரசு மருத்துவமனைக்கு அனுப்பி வைத்தனர்.
இதுதொடர்பாக ஜோலார்பேட்டை ரெயில்வே போலீசார் வழக்குப்பதிவு செய்து விசாரணை நடத்தி வருகின்றனர்.