தினத்தந்தி புகார் பெட்டி

திருச்சி மாவட்டம், தொட்டியம்-அரங்கூர் குறுக்கு சாலை மண் சாலையாக உள்ளதால் பொதுமக்கள், வாகன ஓட்டிகள் பெரிதும் அவதிப்பட்டு வருகின்றனர் என தினத்தந்தி புகார் பெட்டியில் செய்தி வெளியிடப்பட்டது. இதனை அறிந்த சம்பந்தப்பட்ட அதிகாரிகள் விரைந்து நடவடிக்கை எடுத்து தற்போது சாலை அமைக்கும் பணிகளை தொடங்கியுள்ளனர். இதற்கு செய்தி வெளியிட்ட தினத்தந்தி புகார் பெட்டிக்கும், நடவடிக்கை எடுத்த அதிகாரிகளுக்கும் அப்பகுதி மக்கள் நன்றி தெரிவித்தனர். 

பொதுமக்கள், தொட்டியம், திருச்சி. 

கரூர் மாவட்டம் பாலத்துறை அருகே   நொய்யல்- பரமத்தி வேலூர் செல்லும்  சாலையின் ஓரத்தில் கடந்த பல ஆண்டுகளுக்கு முன்பு மின் கம்பம் நடப்பட்டது. அந்த மின் கம்பத்திலிருந்து அப்பகுதியில் உள்ள வீடுகளுக்கு மின்சார வினியோகம் செய்யப்பட்டு வருகிறது. இந்த நிலையில் மின்கம்பம் அமைக்கப்பட்டு பல ஆண்டுகள் ஆனதால் தற்போது  அதன் அடிப்பகுதி சிதிலமடைந்து கம்பிகள் வெளியே தெரிகின்றன. சாலையில் வாகனங்கள், பொதுமக்கள் செல்லும் போது இந்த மின்கம்பம் முறிந்து விழுந்தால் உயிரிழப்பு ஏற்பட அதிக வாய்ப்பு உள்ளது. தற்போது அதன் அருகே புதிய மின்கம்பம் அமைக்கப்பட்டும் அதில் மின் இணைப்புகள் மாற்றப்படாமல் உள்ளது. எனவே இதுகுறித்து சம்பந்தப்பட்ட அதிகாரிகள் நடவடிக்கை எடுக்க வேண்டும் என கேட்டுக்கொள்கிறோம். 

வேலு ,பாலத்துறை, கரூர்.

திருச்சி மாவட்டம், முசிறி வட்டம், நெய்வேலி கிராமம் ஸ்ரீ வரதராஜ பெருமாள் கோவில் மற்றும் சிவன் கோவில் உள்ளது. இது 300 ஆண்டுகளுக்கும் மேலான பழமையான கோவில் என ஆய்வறிக்கைகள் கூறுகின்றன. தற்போது இந்த கோவில்களில் மின் இணைப்பு இன்றி உள்ளது. இதனால் கோவிலுக்கு வரும் பக்தர்கள் பெரிதும் அவதி அடைந்து வருகின்றனர். மேலும் கோவில் மேல் பகுதியில்  செடி மரம் வளர்ந்து பழுதடைந்து வருகிறது. எனவே இதுகுறித்து அறநிலையத்துறை அதிகாரிகள் நடவடிக்கை எடுக்க வேண்டும் என கேட்டுக்கொள்கிறோம். 

லோகநாதன், நெய்வேலி, திருச்சி. 

திருச்சி மத்திய பஸ் நிலையத்தில் பொது இடங்களில் பயணிகள் புகை பிடிப்பதினால் பெண்கள், முதியவர்கள் பெரிதும் உடல்நிலை பாதிக்கப்பட்டு வருகின்றனர். எனவே இதனை தடுக்க பொது இடங்களில் புகை பிடிப்பவர்கள் மீது நடவடிக்கை எடுக்க வேண்டும் என கேட்டுக்கொள்கிறோம். 

பொதுமக்கள், திருச்சி. 

திருச்சி மாவட்டம், லால்குடியில் அமைக்கப்பட்டுள்ள ரெயில்வே சுரங்கப்பாதையில் எப்போதும் குளம்போல் தண்ணீர் தேங்கி நிற்கிறது. இதனால் இந்த ரெயில்வே சுரங்கப்பாதை வழியாக ரெயில்வே பாதையை கடக்க முடியாமல் ரெயில்வே தண்டவாளத்தை பொதுமக்கள் கடந்து சென்று வருகின்றனர். இதனால் பொதுமக்கள் விபத்தில் சிக்கிக்கொள்ளும் நிலை ஏற்பட்டுள்ளது. எனவே இதுகுறித்து சம்பந்தப்பட்ட அதிகாரிகள் நடவடிக்கை எடுக்க வேண்டும் என கேட்டுக்கொள்கிறோம். 

மாலதி, லால்குடி, திருச்சி. 

திருச்சி மாவட்டம், தொட்டியம் வாணப்பட்டரை முதல் வளையல் காரத்தெரு வரை உள்ள சாலை மிகவும் சேதமடைந்து குண்டும், குழியுமாக உள்ளது. இதனால் வாகன ஓட்டிகள் கடும் அவதிக்குள்ளாகி வருகின்றனர். மேலும் மோட்டார் சைக்கிளில் செல்பவர்கள் நிலைதடுமாறி கீழே விழுந்து காயம் அடைந்து வருகின்றனர். எனவே இதுகுறித்து சம்பந்தப்பட்ட அதிகாரிகள் விரைந்து நடவடிக்கை எடுக்க வேண்டும் என கேட்டுக்கொள்கிறோம். 

பொதுமக்கள், தொட்டியம், திருச்சி.