ஆட்டோ கவிழ்ந்து பெண் பலி

கடமலைக்குண்டு:

கடமலைக்குண்டு அருகே உள்ள பாலூத்து கிராமத்தை சேர்ந்தவர் கோட்டைகருப்பசாமி. அவருடைய மனைவி அமுதா (வயது 46). நேற்று இவர், தங்கம்மாள்புரத்தில் வசிக்கிற தனது தம்பி முருகன் வீட்டுக்கு சென்றார்.

 அப்போது முருகனின் 15 வயது மகன் கபிலனுக்கு திடீரென வலிப்பு ஏற்பட்டது. இதனையடுத்து அமுதா, முருகன் ஆகியோர் கபிலனை ஆட்டோவில் ஏற்றிக்கொண்டு கடமலைக்குண்டு அரசு மருத்துவமனைக்கு சிகிச்சைக்காக கொண்டு சென்றனர். ஆட்டோவை, தங்கம்மாள்புரம் கிராமத்தை சேர்ந்த மகேஷ்வரன் (39) என்பவர் ஓட்டினார்.

மயிலாடும்பாறை அருகே வந்தபோது, கட்டுப்பாட்டை இழந்த ஆட்டோ திடீரென சாலையில் தலைக்குப்புற கவிழ்ந்து விபத்துக்குள்ளானது. இதில் ஆட்டோவில் இருந்து தூக்கி வீசப்பட்ட அமுதா தலையில் பலத்த காயமடைந்து சம்பவ இடத்திலேயே பரிதாபமாக இறந்தார். 

கபிலன், முருகன், மகேஷ்வரன் ஆகியோர் லேசான காயத்துடன் உயிர் தப்பினர். இந்த விபத்து குறித்து மயிலாடும்பாறை போலீசார் வழக்குப்பதிவு செய்து விசாரணை நடத்தி வருகின்றனர்.