சேலத்தில் போலீஸ் சோதனையில் சரக்கு வாகனம் பறிமுதல்:நடுரோட்டில் தீக்குளித்த டிரைவருக்கு ஆஸ்பத்திரியில் தீவிர சிகிச்சை-வீடியோ வைரலாகி வருவதால் பரபரப்பு
சேலத்தில் வாகன சோதனையில் சரக்கு வாகனம் பறிமுதல் செய்யப்பட்டதால் நடுரோட்டில் தீக்குளித்த டிரைவருக்கு அரசு ஆஸ்பத்திரியில் தீவிர சிகிச்சை அளிக்கப்பட்டு வருகிறது. தீக்குளித்த வீடியோ வைரலாகி வருவதால் பரபரப்பு ஏற்பட்டுள்ளது.
சேலம்:
சேலத்தில் வாகன சோதனையில் சரக்கு வாகனம் பறிமுதல் செய்யப்பட்டதால் நடுரோட்டில் தீக்குளித்த டிரைவருக்கு அரசு ஆஸ்பத்திரியில் தீவிர சிகிச்சை அளிக்கப்பட்டு வருகிறது. தீக்குளித்த வீடியோ வைரலாகி வருவதால் பரபரப்பு ஏற்பட்டுள்ளது.
சரக்கு வாகன டிரைவர்
சேலம் அமானி கொண்டலாம்பட்டி அரசமரத்து கரட்டூரை சேர்ந்தவர் அர்ஜூனன். இவருடைய மகன் சந்தோஷ் (வயது 25). சரக்கு வாகன டிரைவர். இவர், நேற்று முன்தினம் இரவு கொண்டலாம்பட்டி ரவுண்டானா பகுதிக்கு தனது சரக்கு வாகனத்துடன் வந்துள்ளார். அங்கு வாகன சோதனையில் ஈடுபட்டு இருந்த போலீசார், சந்தோஷ் ஓட்டி வந்த வாகனத்தை நிறுத்தி அவர் வைத்திருந்த ஆவணங்களை சரிபார்த்தனர்.
அப்போது சந்தோஷ் மதுபோதையில் இருந்ததாக கூறி அவரது வாகனத்தை போலீசார் பறிமுதல் செய்ததுடன், ரூ.10 ஆயிரம் அபராதம் விதிக்கப்பட்டதாகவும் கூறப்படுகிறது. இதில் விரக்தி அடைந்த சந்தோஷ் அங்கிருந்து புறப்பட்டு சென்றுள்ளார்.
நடுரோட்டில் தீக்குளிப்பு
சிறிது நேரம் கழித்து கொண்டலாம்பட்டி ரவுண்டானாவுக்கு வந்த சந்தோஷ் கையில் ஒரு கேன் வைத்திருந்தார். அந்த கேனில் பெட்ரோல் இருந்துள்ளது. சந்தோஷ் ரவுண்டானாவின் நடுவில் அதாவது நடுரோட்டில் தனது உடலில் பெட்ரோலை ஊற்றி திடீரென தீ வைத்துக்கொண்டார்.
உடலில் எரியும் தீயுடன் சாலையில் அங்கும், இங்கும் சந்தோஷ் ஓடினார். இதனால் அந்த பகுதியில் நின்றவர்கள் அலறி அடித்துக்கொண்டு ஆங்காங்கே சிதறி ஓடினர். இந்த சம்பவத்தால் கொண்டலாம்பட்டி ரவுண்டானா பகுதியில் பரபரப்பு ஏற்பட்டது.
ஆஸ்பத்திரியில் தீவிர சிகிச்சை
சந்தோஷ் ஓடியதை கண்ட பொதுமக்களில் சிலர், அவரது உடலில் எரிந்த தீயை அணைத்தனர். பின்னர் ஆம்புலன்ஸ் மூலம் சேலம் அரசு ஆஸ்பத்திரியில் சேர்த்தனர். அங்கு அவருக்கு தீவிர சிகிச்சை அளிக்கப்பட்டு வருகிறது.
இதுகுறித்து கொண்டலாம்பட்டி போலீசார் வழக்குப்பதிவு செய்து விசாரணை நடத்தினர். தீக்குளித்த சந்தோசுக்கு இன்னும் திருமணம் ஆகவில்லை. அவரது உடலில் 80 சதவீதம் தீக்காயம் ஏற்பட்டுள்ளதாக டாக்டர்கள் தெரிவித்துள்ளனர். இருப்பினும் அவர் தொடர்ந்து டாக்டர்களின் தீவிர கண்காணிப்பில் உள்ளார்.
வைரலாகும் வீடியோ
இதற்கிடையே உடலில் பற்றி எரியும் தீயுடன் சந்தோஷ் சாலையில் ஓடும் காட்சி அங்குள்ள கண்காணிப்பு கேமராவில் பதிவாகி உள்ளது. அந்த காட்சி தற்போது வாட்ஸ்-அப் உள்ளிட்ட சமூக வலைதளங்களில் வைரலாக பரவி பரபரப்பை ஏற்படுத்தி உள்ளது.