கூடலூர் அருகே சந்தனமலை முருகன் கோவிலில் பங்குனி உத்திர திருவிழா 17 ந் தேதி தொடங்குகிறது

கூடலூர்

சந்தனமலை முருகன் கோவிலில் பங்குனி உத்திர திருவிழா வருகிற 17-ந் தேதி தொடங்குகிறது 

கூடலூர் தாலுகா ஓவேலி பேரூராட்சி சந்தனமலையில் பிரசித்தி பெற்ற முருகன் கோவில் உள்ளது. இங்கு பங்குனி உத்திர திருவிழா ஆண்டுதோறும் விமரிசையாக நடைபெறுவது வழக்கம். 

கடந்த 2 ஆண்டுகளாக கொரோனா கட்டுப்பாடு கள் காரணமாக விழாக்கள் ரத்து செய்யப்பட்டு இருந்தது. இந்த நிலையில் பங்குனி உத்திர திருவிழா வருகிற 17-ந் தேதி தொடங்கி 3 நாட்கள் நடக்கிறது. 

இதையொட்டி காலை 4.30 மணிக்கு மகா கணபதி ஹோமமும், தொடர்ந்து அபிஷேக அலங்கார சிறப்பு பூஜைகள் நடக்கிறது. 7.30 மணிக்கு கொடியேற்றுதல் நிகழ்ச்சியும், பகல் 12 மணிக்கு உச்சிகால தீபாராதனையும் நடக்கிறது. 

இரவு 7 மணிக்கு பார்வுட் பசுவண்ணன் சிவன் கோவிலில் இருந்து ஸ்ரீ முருகன், வள்ளி- தெய்வானை தேர்கள் புறப்பட்டு முக்கிய சாலைகள் வழியாக கோவிலை வந்தடைகிறது. தொடர்ந்து அதிகாலை 3 மணிக்கு ஊஞ்சல் உற்சவ சிறப்பு பூஜைகள் நடக்கிறது. 

18-ந் தேதி 6 மணிக்கு முருகன் மற்றும் பரிவார தெய்வங்களுக்கு சிறப்பு பூஜைகளும், பகல் 12 மணிக்கு உச்சிகால தீபாராதனையும் நடைபெறுகிறது. தொடர்ந்து இரவு 11 மணி வரை விசேஷ பூஜைகள் நடக்கிறது. பின்னர் இன்னிசை கச்சேரி நடக்கிறது. 

19-ந் தேதி காலை 6 மணி முதல் மதியம் 12 மணி வரை பல்வேறு விசேஷ பூஜைகள் நடக்கிறது. இரவு 7 மணிக்கு மஞ்சள் நீராட்டு விழா நடக்கிறது. இதற்கான ஏற்பாடுகளை கோவில் நிர்வாகம் மற்றும் பக்தர்கள் செய்து வருகின்றனர். 

இதேபோல் விழாவில் கலந்து கொள்ளும் பக்தர்கள் அரசின் வழிகாட்டி நெறிமுறைகளை கண்டிப்பாக பின்பற்ற வேண்டும் என கோவில் நிர்வாகம் அறிவித்து உள்ளது.