பெண்ணை தற்கொலைக்கு தூண்டிய பஸ் டிரைவர் கைது
மன்னார்குடி அருகே பெண்ணை தற்கொலைக்கு தூண்டியதாக பஸ் டிரைவரை போலீசார் கைது செய்தனர்.
மன்னார்குடி;
மன்னார்குடி அருகே பெண்ணை தற்கொலைக்கு தூண்டியதாக பஸ் டிரைவரை போலீசார் கைது செய்தனர்.
காதல்
மன்னார்குடி அருகே உள்ள திருவண்டுதுறை பகுதியை சேர்ந்தவர் ராஜேந்திரன். இவருடைய மகள் அனு(வயது30). இவர் மன்னார்குடியில் உள்ள தனியார் நிறுவனத்தில் வேலை செய்து வந்தார்.
வடபாதிமங்கலம் அருகே உள்ள தண்ணீர்குன்னம் பகுதியை சேர்ந்தவர் முகமதுரியாஸ்(24). தனியார் பஸ் டிரைவரான இவரது பஸ்சில் அனு மன்னார்குடிக்கு வேலைக்கு வந்து சென்று வந்தார். அப்போது முகமதுாியாசுக்கும் அனுவுக்கும் இடையே காதல் ஏற்பட்டது.
திருமணம் செய்ய மறுப்பு
இந்தநிலையில் திடீரென அனுவை, முகமதுரியாஸ் திருமணம் செய்ய மறுத்தார். இதனால் மனமுடைந்த அனு கடந்த மாதம் 21-ந் தேதி மன்னார்குடி பாலகிருஷ்ண நகர் செல்லும் வழி அருகில் விஷம் தின்று மயங்கி விழுந்தார். அவரை அக்கம் பக்கத்தினர் மீட்டு மன்னார்குடி அரசு ஆஸ்பத்திரியில் சிகிச்சைக்காக சேர்த்தனர்.
பின்னர் அவர் மேல் சிகிச்சைக்காக திருவாரூர் மருத்துவக் கல்லூரி ஆஸ்பத்திரிக்கு கொண்டு செல்லப்பட்டார். அங்கு சிகிச்சை பலனின்றி அனு மரணம் அடைந்தார்.
கைது
இது குறித்து அனுவின் தந்தை ராஜேந்திரன் மன்னார்குடி போலீசில் புகார் அளித்தார். இதன்பேரில் காதலித்து ஏமாற்றி பெண்ணை தற்கொலைக்கு தூண்டியதாக முகமது ரியாஸ் மீது மன்னார்குடி போலீசார் வழக்குப்பதிவு செய்து விசாரணை நடத்தி வந்தனர். இந்நிலையில் நேற்று முகமது ரியாசை போலீசார் கைது செய்தனர். இது தொடர்பாக மேலும் விசாரணை நடைபெற்று வருகிறது.