நத்தத்தில் அரசின் சாதனை விளக்க புகைப்பட கண்காட்சி

திண்டுக்கல்:

நத்தத்தில் செய்தி மக்கள் தொடர்பு துறையின் சார்பில் தமிழக அரசின் சாதனை விளக்க புகைப்பட கண்காட்சி நடைபெற்றது. இதில் ஆவின் பால் விலை குறைப்பு, பெண்களுக்கு இலவச பஸ் பயணம், கொரோனா நோயாளிகளுக்கு அரசு காப்பீட்டு திட்டத்தில் சிகிச்சை, கொரோனா நிவாரணம், 14 வகை மளிகை பொருட்கள், உங்கள் தொகுதியில் முதல்-அமைச்சர் திட்டம், மக்களை தேடி மருத்துவ திட்டம், கலைஞரின் அனைத்து கிராம ஒருங்கிணைந்த வேளாண் வளர்ச்சி திட்டம், 5 பவுன் நகைக்கடன் தள்ளுபடி உள்பட அரசின் பல்வேறு திட்டங்கள் தொடர்பான புகைப்படங்கள் இடம்பெற்றன.

அதேபோல் கூட்டுறவுத்துறை அமைச்சர் இ.பெரியசாமி, உணவுத்துறை அமைச்சர் அர.சக்கரபாணி, கலெக்டர் விசாகன் ஆகியோர் நலத்திட்ட உதவிகள் வழங்கிய புகைப்படங்கள், வளர்ச்சி பணிகளை தொடங்கி வைத்த புகைப்படங்களும் இடம்பெற்று இருந்தன. இதனை ஏராளமான பொதுமக்கள் பார்வையிட்டனர்.