மோட்டார் சைக்கிள்கள் நேருக்கு நேர் மோதல்; முதியவர் பலி

புகழூர் அருகே மேத்யூ நகரை சேர்ந்தவர் மலையாளன் (வயது 67). இவர் புகழூரில் உள்ள தனியார் சர்க்கரை ஆலையில் பிட்டராக வேலை பார்த்து ஓய்வு பெற்றவர் ஆவார். இவர், நேற்று முன்தினம் தனது மோட்டார் சைக்கிளில் வேலாயுதம்பாளையத்தில் இருந்து தளவாபாளையம் செல்லும் சாலையில் உள்ள புகழூர் 4 ரோடு பகுதியில் சென்று கொண்டிருந்தார்.

அப்போது எதிர் திசையில் கரூர் வெங்கமேடு இந்திரா நகரை சேர்ந்த மாயவன் (39) என்பவர் தனது மோட்டார் சைக்கிளில் அதிவேகமாக வந்து மலையாளன் ஓட்டிவந்த மோட்டார் சைக்கிள் மீது மோதினார். இதில் மலையாளனுக்கு தலை மற்றும் பல்வேறு பகுதியில் பலத்த காயம் ஏற்பட்டது. மாயவனுக்கு லேசான காயம் ஏற்பட்டது. 

இதையடுத்து, அந்த வழியாக சென்றவர்கள் மலையாளனை மீட்டு கரூரில் உள்ள ஒரு தனியார் மருத்துவமனைக்கு அனுப்பி வைத்தனர். அங்கு சிகிச்சை அளிக்கப்பட்டு மேல் சிகிச்சைக்காக கோவையில் உள்ள ஒரு தனியார் மருத்துவமனைக்கு அனுப்பி வைத்தனர். அங்கு அவருக்கு டாக்டர்கள் தீவிர சிகிச்சை அளித்தனர். இந்த நிலையில் சிகிச்சை பலனின்றி மலையாளன் பரிதாபமாக இறந்தார். மேலும், லேசான காயம் அடைந்த மாயவனுக்கு அப்பகுதியில் உள்ள ஒரு தனியார் மருத்துவமனையில் சிகிச்சை அளிக்கப்பட்டு வருகிறது.

இந்த விபத்து குறித்து வேலாயுதம்பாளையம் சப்-இன்ஸ்பெக்டர் பெரியசாமி வழக்குப்பதிவு செய்து மோட்டார் சைக்கிளை அதிவேகமாக ஓட்டி விபத்து ஏற்படுத்திய மாயவன் மீது வழக்குப்பதிவு செய்து விசாரணை நடத்தி வருகின்றனர்.