மோட்டார் சைக்கிளில் இருந்து தவறி விழுந்த வாலிபர் பலி

கீரனூரை அடுத்த ஓ.பள்ளத்துப்பட்டியை சேர்ந்தவர் ரங்கராஜ். இவருடைய மகன் செல்வராஜ் (வயது 28). என்ஜினீயரிங் பட்டதாரியான இவர் வெளிநாடு செல்வதற்கான ஏற்பாடுகளை செய்து கொண்டிருந்தார். நேற்று முன்தினம் இரவு தனது மோட்டார் சைக்கிளில் கீரனூர் சென்று விட்டு தனது வீட்டிற்கு சென்று கொண்டிருந்தார். அப்போது மோசகுடிவிலக்கு அருகே தெருநாய் ஒன்று சாலையின் குறுக்கே வந்ததால் திடீரென பிரேக் பிடித்தார். இதில், நிலைத்தடுமாறி மோட்டார் சைக்கிளில் இருந்து கீழே விழுந்தார். இதில், தலையில் பலத்த காயம் அடைந்த அவரை அந்த வழியாக சென்ற வாகன ஓட்டிகள் மீட்டு கீரனூர் அரசு மருத்துவமனையில் அனுமதித்தனர். பின்னர் மேல் சிகிச்சைக்காக புதுக்கோட்டை அரசு மருத்துவமனைக்கு கொண்டு செல்லப்பட்டார். ஆனால் செல்லும் வழியிலேயே செல்வராஜ் பரிதாபமாக இறந்தார். இந்த விபத்து குறித்து கீரனூர் சப்-இன்ஸ்பெக்டர் மலையரசன் வழக்குப்பதிவு செய்து விசாரணை நடத்தி வருகிறார்.