அங்கன்வாடி பணியாளரை வெட்டியவர் கைது

கயத்தாறு:

கயத்தாறு அருகே பணிக்கர்குளம் கீழத்தெருவை சேர்ந்தவர் ஜெயமுருகன் மனைவி பூல்த்தாய் (வயது 40). இவர் கயத்தாறு சாலைப்புதூரில் அங்கன்வாடி பணியாளராக பணியாற்றி வருகிறார். இவரது குடும்பத்திற்கும், அதே ஊரைச் சேர்ந்த பரமசிவம் (47) என்பவருடைய குடும்பத்திற்கும் இடையே முன்விரோதம் இருந்து வருகிறது.

இந்த நிலையில் நேற்று முன்தினம் பூல்த்தாய் வீட்டில்  பரமசிவம், அவரது மனைவி மாரியம்மாள், மகன் மலையரசன் ஆகியோர் அத்துமீறி நுழைந்துள்ளனர். பின்னர் பூல்த்தாயை சரமாரியாக அரிவாளால் வெட்டி விட்டு தப்பி ஓடி விட்டனர். இதில் பலத்த காயமடைந்த பூல்த்தாய் பாளையங்கோட்டை ஐகிரவுண்டு அரசு ஆஸ்பத்திரியில் அனுமதிக்கப்பட்டு சிகிச்சை பெற்று வருகிறார். இதுகுறித்து கயத்தாறு போலீஸ் இன்ஸ்பெக்டர் முத்து வழக்குப்பதிவு செய்து நேற்று பரமசிவத்தை கைது செய்தார். மேலும், மாரியம்மாள், மலையரசன் ஆகிய 2 பேரையும் போலீசார் வலைவீசி தேடி வருகின்றனர்.