திருவப்பூர் முத்துமாரியம்மன் கோவில் பூச்சொரிதல் விழா

புதுக்கோட்டை அருகே உள்ள திருவப்பூரில் மிகவும் புகழ் பெற்ற முத்துமாரியம்மன் கோவில் உள்ளது. இக்கோவிலில் ஆண்டு தோறும் மாசி பெருந்திருவிழா சிறப்பாக நடைபெறும். விழாவையொட்டி பூச்சொரிதல் விழாவுடன் கூடிய தேரோட்டம் காப்புகட்டுதலுடன் தொடங்கி நடைபெறுவது வழக்கம். இந்த ஆண்டு மாசி தேரோட்டத்தை முன்னிட்டு பூச்சொரிதல் விழா நேற்று இரவு நடைபெற்றது. இதையொட்டி முத்துமாரியம்மனுக்கு சிறப்பு அபிஷேகம், ஆராதனை நடைபெற்றது.

இதையொட்டி புதுக்கோட்டை மாவட்டத்தின் பல்வேறு பகுதியை சேர்ந்த திரளான பக்தர்கள் விரதம் இருந்து கோவிலுக்கு ஊர்வலமாக பால்குடம் எடுத்து வந்து, சிறப்பு வழிபாடு நடத்தி தங்களது நேர்த்திக்கடனை செலுத்தினர். இதேபோல பக்தர்கள் அலகு குத்தியும், பறவை காவடி எடுத்தும், தம்பதிகள் கரும்பில் தொட்டில் கட்டியும் கோவிலுக்கு மேள தாளங்கள், வாண வேடிக்கைகள் முழங்க, ஆட்டம், பாட்டத்துடன் ஊர்வலமாக எடுத்து வந்து தங்களது நேர்த்திக்கடனை செலுத்தினர்.

பூச்சொரிதல் விழாவை முன்னிட்டு புதுக்கோட்டை நகரில் பல்வேறு பகுதிகளில் நீர்மோர் பந்தல்கள் அமைக்கப்பட்டு, கோவிலுக்கு நேர்த்திக்கடன் செலுத்த ஊர்வலமாக செல்லும் பக்தர்களுக்கு அன்னதானம் மற்றும் நீர்மோர் உள்ளிட்டவைகள் வழங்கப்பட்டது.

இதைத்தொடர்ந்து இரவு புதுக்கோட்டை மற்றும் சுற்று வட்டார பகுதியை சேர்ந்த திரளான பக்தர்கள் தங்கள் பகுதியில் இருந்து முத்துமாரியம்மன் சிலையை அலங்காரத்துடன் அலங்கரிக்கப்பட்ட சப்பரத்தில் பூக்களை வைத்து ஊர்வலமாக எடுத்து வந்து கோவிலில் பூச்சொரிதல் செய்து

வழிபட்டனர். அதை தொடர்ந்து இன்று (திங்கட்கிழமை) அதிகாலையில் பூ பிரிக்கும் நிகழ்ச்சி நடைபெறுகிறது.

இதைத் தொடர்ந்து மார்ச் மாதம் 7-ந் தேதி மாசி தேரோட்டம் நடைபெற உள்ளது. இதையொட்டி வருகிற 27-ந் தேதி இரவு காப்புகட்டுதல் நிகழ்ச்சி நடைபெற உள்ளது. விழா நாட்களில் தினமும் காலை, மாலையில் முத்துமாரியம்மன் வீதி உலா நடைபெறும். விழாவின் முக்கிய நிகழ்ச்சியான 8-ம் திருவிழாவில் பொங்கலும், 9-ம் திருவிழாவில் மாலை தேரோட்டம் நடைபெறும். மாசி தேரோட்ட திருவிழா மார்ச் 14-ந் தேதியுடன் நிறைவு பெறுகிறது. விழாவிற்கான ஏற்பாடுகளை கோவில் நிர்வாகிகள் மற்றும் இந்து சமய அறநிலையத்துறை அதிகாரிகள் சிறப்புடன் செய்து வருகின்றனர்.