கூடலூர் வனக்கோட்டத்தில் வனவிலங்குகள் கணக்கெடுக்கும் பணி தொடக்கம்

கூடலூர்

கூடலூர் வனக்கோட்டத்தில் வனவிலங்கு கணக்கெடுப்பு பணி தொடங்கியது.

நீலகிரி மாவட்டம் முதுமலை புலிகள் காப்பகத்தில் பருவ மழைக்காலத்துக்கு முன் மற்றும் பின்பு என ஆண்டுக்கு 2 முறை வனவிலங்குகள் கணக்கெடுக்கும் பணியில் வனத்துறையினர் ஈடுபட்டு வருகின்றனர். 

அதன் அருகே உள்ள கூடலூர் வனக்கோட்டத்தில் 4 ஆண்டுக்கு ஒருமுறை வனவிலங்குகள் கணக்கெடுக்கும் பணி நடைபெறுகிறது.

கூடலூர் வனக்கோட்டத்தில் உள்ள கூடலூர், ஓவேலி, நாடுகாணி, தேவாலா, சேரம்பாடி, பிதர்காடு ஆகிய வனச்சரகங்களில் காட்டு யானைகள் உள்ளிட்ட வனவிலங்குகள் காலை 7 மணிக்கு தொடங்கி மாலை 5 மணி வரை கணக்கெடுக்கும் பணி நடைபெற்றது. 

கூடலூரில் வனச்சரகர் கணேசன் மேற்பார்வையில் வன ஊழியர்கள் கணக்கெடுப்பில் ஈடுபட்டனர்.

வனவிலங்குகளின் கால் தடங்கள், எச்சங்கள் கொண்டு அடையாளம் காணுதல், நேரில் பார்வையிடுதல் உள்ளிட்ட பல்வேறு முறைகளில் வன ஊழியர்கள் ஈடுபட்டனர். 

இப்பணியில் தலா 4 பேர் கொண்ட 16 குழுக்கள் பணியாற்றி வருகின்றனர். இதேபோல் தேவாலா வனச்சரகர் ராம்குமார் மேற்பார்வையில் வன ஊழியர்கள் கிளன்ராக் உள்பட வனத்தில் கணக்கெடுப்பு மேற்கொண்டனர்.