100 சதவீதம் வாக்களிப்பதின் அவசியம் குறித்து அதிநவீன மின்னணு வாகனம் மூலம் பொதுமக்களுக்கு விழிப்புணர்வு

கிருஷ்ணகிரி:

நகர்ப்புற உள்ளாட்சி தேர்தலில், 100 சதவீதம் வாக்களிப்பதின் அவசியம் குறித்து அதிநவீன மின்னணு வாகனம் மூலம் பொதுமக்களுக்கு விழிப்புணர்வு ஏற்படுத்தப்படுகிறது.

கிருஷ்ணகிரி மாவட்ட கலெக்டர் அலுவலகத்தில் செய்தி மக்கள் தொடர்புத்துறையின் சார்பில் நகர்ப்புற உள்ளாட்சி தேர்தலில் 100 சதவீதம் வாக்களிப்பதின் அவசியம் குறித்து அதிநவீன மின்னணு வீடியோ விளம்பர வாகனத்தின் மூலம் பொதுமக்களுக்கு விழிப்புணர்வு ஏற்படுத்தப்படுகிறது. இந்த விழிப்புணர்வு குறும்படங்களை, மாவட்ட தேர்தல் அலுவலரும், கலெக்டருமான ஜெயசந்திரபானுரெட்டி பார்வையிட்டார். அப்போது அவர் கூறியதாவது:-

கிருஷ்ணகிரி மாவட்டத்தில், ஓசூர் மாநகராட்சி, கிருஷ்ணகிரி நகராட்சி மற்றும் கெலமங்கலம், தேன்கனிக்கோட்டை, காவேரிப்பட்டணம், பர்கூர், ஊத்தங்கரை, நாகோஜனஅள்ளி ஆகிய 6 பேரூராட்சிகளுக்கு வருகிற 19-ந்தேதி தேர்தல் நடைபெறுகிறது. பொதுமக்கள் 100 சதவிகிதம் வாக்களிப்பதன் அவசியத்தை உணர்த்தும் வகையில் தேர்தல் தொடர்பான விழிப்புணர்வு குறும்படங்கள் செய்தி மக்கள் தொடர்புத்துறையின் சார்பில் அதிநவீன மின்னணு வீடியோ விளம்பர வாகனத்தின் மூலம் மாநகராட்சி, நகராட்சி, பேரூராட்சி பகுதிகளில் ஒளிபரப்பப்பட உள்ளது.

பொதுமக்கள் மின்னணு வாக்குப்பதிவு எந்திரம் பயன்படுத்துவது குறித்த குறும்படம், மாற்றுத்திறனாளிகள், மகளிர் மற்றும் முதியோர் ஆகியோருக்கு வாக்குச்சாவடி மையங்களில் ஏற்படுத்தப்பட்டுள்ள வசதிகள் குறித்த குறும்படங்கள், ஒளிப்பரப்பபட உள்ளது. எனவே, பொதுமக்கள் தேர்தல் தொடர்பான குறும்படங்களை கண்டு, மாவட்டத்தில் 100 சதவிகிதம் வாக்குப்பதிவை உறுதிப்படுத்த ஒத்துழைப்பு வழங்க வேண்டும். 

இவ்வாறு அவர் கூறினார்.

இதில் மாவட்ட வருவாய் அலுவலர் ராஜேஸ்வரி, கலெக்டரின் நேர்முக உதவியாளர் (பொது) முருகன், கலெக்டர் அலுவலக மேலாளர் சண்முகம், தேர்தல் தாசில்தார் ஜெய்சங்கர் உள்ளிட்ட பலர் கலந்து கொண்டனர்.