தாளவாடி அருகே குட்டையில் மூழ்கி கல்லூரி மாணவர் பலி

தாளவாடி

தாளவாடியை அடுத்த சிமிட்டஹள்ளி கிராமத்தை சேர்ந்தவர் சித்தமல்லு. இவருைடய மகன் சிவக்குமார் (வயது 19). இவர் கர்நாடக மாநிலம் மைசூரில் உள்ள தனியார் கல்லூரியில் பி.ஏ. முதலாம் ஆண்டு படித்து வந்தார். தற்போது கல்லூரிக்கு விடுமுறை விடப்பட்டு உள்ளது. இதனால் விடுமுறையை கழிப்பதற்காக அவர் தனது சொந்த ஊருக்கு வந்து உள்ளார். நேற்று முன்தினம் வீட்டை விட்டு சிவக்குமார் வெளியே சென்றார். ஆனால் வீடு திரும்பவில்லை.

இந்த நிலையில் நேற்று காலை சிவக்குமார் அந்த பகுதியில் உள்ள குட்டையில் மூழ்கி இறந்தது தெரியவந்தது. உடனே சிவக்குமாரின் உடலை பொதுமக்கள் மீட்டு வெளியே கொண்டு வந்தனர். இதுபற்றி அறிந்ததும் தாளவாடி போலீசார் சம்பவ இடத்துக்கு விரைந்து சென்று சிவக்குமாரின் உடலை கைப்பற்றி பிரேத பரிசோதனைக்காக சத்தியமங்கலம் அரசு ஆஸ்பத்திரிக்கு அனுப்பி வைத்தனர். இதுகுறித்து போலீஸ் இன்ஸ்பெக்டர் அன்பரசு வழக்குப்பதிவு செய்து விசாரணை நடத்தி வருகிறார்.