கிறிஸ்துமஸ், புத்தாண்டையொட்டி கர்நாடகத்தில் ரூ.974 கோடிக்கு மதுபானம் விற்பனை

பெங்களூரு: கிறிஸ்துமஸ், புத்தாண்டையொட்டி கர்நாடகத்தில் ரூ.974 கோடிக்கு மதுபானம் விற்பனை செய்யப்பட்டு உள்ளதாக கலால் துறையினர் தெரிவித்துள்ளனர். 

கர்நாடகத்தில் பண்டிகை தினங்களில் பல கோடி ரூபாய்க்கு மது விற்பனை நடப்பது வழக்கம். இந்த நிலையில் கடந்த ஆண்டு (2021) டிசம்பர் மாதம் 24-ந் தேதி முதல் 31-ந் தேதி வரை கிறிஸ்துமஸ், புத்தாண்டையொட்டி கர்நாடகத்தில் ரூ.974 கோடிக்கு மது விற்பனை நடந்து உள்ளது. இதுகுறித்து கலால்துறை அதிகாரிகள் கூறியதாவது:-

கர்நாடகத்தில் கடந்த 2020-ம் ஆண்டு கொரோனா பரவல் காரணமாக மதுக்கடைகள் மூடப்பட்டதால் கலால்துறைக்கு வருமானம் குறைந்து இருந்தது. கடந்த 2020-ம் ஆண்டின் இறுதியில் அதாவது டிசம்பர் 24-ந் தேதி முதல் 31-ந் தேதி வரை 14 லட்சத்து 14 ஆயிரத்து பெட்டிகளில் இருந்த மதுபானம் விற்பனை ஆகி இருந்தது. கடந்த 2021-ம் ஆண்டு டிசம்பர் 24-ந் தேதி முதல் 31-ந் தேதி வரை 17 லட்சத்து 14 ஆயிரத்து பெட்டிகளில் இருந்த மதுபானம் விற்பனை செய்யப்பட்டு உள்ளது.

இதுபோல கடந்த 24-ந் தேதி முதல் 31-ந் தேதி வரை 10.90 லட்சம் பெட்டி பீர் வகைகள் விற்பனை ஆனது. கடந்த 2020-ம் ஆண்டு டிசம்பர் 24-ந் தேதி முதல் 31-ந் தேதி வரை 9 லட்சம் பெட்டி பீர் வகைகள் விற்பனையானது.