தொண்டி புதுக்குடி கிராமத்திற்குள் கடல் நீர் புகுந்தது; மீனவர்கள் அவதி

தொண்டியில் நேற்று வழக்கத்தை விட அதிகமாக கடல் சீற்றம் காணப்பட்டது. இதன் காரணமாக தொண்டி புதுக்குடி பகுதியில் கடல்நீர் குடியிருப்புகளுக்குள் புகுந்தன. அப்பகுதியில் உள்ள பெரும்பாலான வீடுகளுக்குள் தண்ணீர் புகுந்ததால் பொதுமக்கள் பெரிதும் அவதிக்கு ஆளாகினர். நீண்ட நேரத்திற்கு பின்னர் குடியிருப்பு பகுதியை சூழ்ந்த தண்ணீர் மீண்டும் கடலுக்குள் திரும்பி சென்றதால் அப்பகுதி பொதுமக்கள் நிம்மதியடைந்தனர்.
இது குறித்து அப்பகுதி பொதுமக்கள் கூறியதாவது:-
வீடுகளை சூழ்ந்து கொண்ட கடல்நீர் பின்னர் வீடுகளுக்குள் புகுந்து விட்டது. நீண்ட நேரம் கடலில் சீற்றம் அதிகமாக இருந்தது.இதில் கடற்கரையில் நிறுத்தப்பட்டிருந்த படகுகளும் ஒன்றோடு ஒன்று மோதி சேதமடைந்தது. நீண்ட நேரத்திற்கு பின்னர் கடல் உள் வாங்கியது அப்போது தான் குடியிருப்பு பகுதிக்குள் புகுந்த கடல்நீர் மீண்டும் கடலுக்குள் சென்றது.
பின்னர் வீடுகளுக்குள் புகுந்த தண்ணீரை அகற்றினோம். புயல், மழை காலங்களில் வெள்ளப்பெருக்கு அதிகமாக இருக்கும். ஆனால் இப்படி குடியிருப்புகளுக்குள் தண்ணீர் புகுந்ததை இப்போது தான் பார்த்துள்ளோம். கடல் நீர் குடியிருப்புக்குள் புகுந்ததால் மீனவர்களாகிய நாங்கள் பெரிதும் பாதிக்கப்பட்டு உள்ளோம்.
எனவே தொண்டி மற்றும் புதுக்குடி கடற்கரை பகுதியில் கடல் நீர் ஊருக்குள் வருவதை தடுக்கும் வகையிலும் கடற்கரையை ஒட்டிய பகுதியில் வசிக்கும் பொதுமக்களுக்கு பாதுகாப்பு ஏற்படுத்தும் வகையிலும் தமிழக அரசு தடுப்பு சுவர் அமைத்து தர வேண்டும்.
இவ்வாறு அவர்கள் கூறினார்கள்.