பஸ் மோதி தொழிலாளி பலி

கரூர் அருகே உள்ள ஆண்டாங்கோவில் பகுதிக்குட்பட்ட சரஸ்வதி நகர் பகுதியை சேர்ந்தவர் சிங்காரம் (வயது 50). கூலித்தொழிலாளியான இவர், நேற்று முன்தினம் கரூர்-கோவை சாலையில் நடந்து சென்று கொண்டிருந்தார். அப்போது அந்த வழியாக வந்த ஒரு தனியார் பஸ் எதிர்பாராத விதமாக சிங்காரத்தின் மீது மோதியது. இதில் தலையில் பலத்த காயம் அடைந்த அவரை அங்கிருந்தவர்கள் மீட்டு சிகிச்சைக்காக கரூர் அரசு மருத்துவக்கல்லூரி மருத்துவமனைக்கு அனுப்பி வைத்தனர். அங்கு சிகிச்சை பலனின்றி சிங்காரம் பரிதாபமாக இறந்தார். இந்த விபத்து குறித்து கரூர் டவுன் போலீசார் வழக்குப்பதிவு செய்து விசாரணை நடத்தி வருகின்றனர்.