‘தினத்தந்தி‘ புகார் பெட்டி: மக்கள் குறைகள் தொடர்பான பதிவுகள்

திருவள்ளூர் மாவட்டம் வைவாசி கண்டிகை வெள்ளியூர் பஞ்சாயத்துக்குட்பட்ட பகுதியில் குரங்குகள் நடமாட்டம் அதிகமாக இருக்கிறது. குரங்குகள் அட்டகாசம் நாளுக்கு நாள் தாங்க முடியாமல் உள்ளது. கேபிள் வயர்களில் தொங்குவது, வீட்டு தோட்டத்தை நாசப்படுத்துவது என்று தினமும் இம்சை கொடுத்து வருகின்றன. எனவே வனத்துறை அதிகாரிகள் இப்பகுதியில் சுற்றித்திரியும் குரங்குகளை பிடித்து சென்று வனப்பகுதிகளில் விடவேண்டும் என்று கோரிக்கை விடுக்கிறோம்.

- சினேகா, வெள்ளியூர்.

தாம்பரம் சேலையூர் இந்திராநகர் சந்திப்பு கற்பகம் நகர்-பகவதி நகர் மெயின் ரோட்டில் உள்ள மழைநீர் கட்டமைப்பு முறையாக இல்லை. அதாவது மழைநீர் கால்வாயில் அடைப்பு ஏற்படும்போது அதனை சரி செய்வதற்காக குறிப்பிட்ட இடங்களில் அமைக்கப்படும் மூடி போன்ற அமைப்பு சாலை மட்டத்தை விட அரை அடி உயரத்தில் உள்ளது. இதன்காரணமாக வாகன ஓட்டிகள் அடிக்கடி விபத்தை சந்திக்கும் நிலை உள்ளது.பாதசாரிகள் சற்று கவனம் தவறினாலும் தடுமாறி கீழே விழும் அபாயம் உள்ளது. எனவே மழைநீர் கால்வாய் மூடியை சாலை மட்டத்துக்கு அமைத்து விபத்துகளை தடுக்கவேண்டும்.

- சுதர்சன், சேலையூர்.

திருவள்ளூர் மாவட்டம் மணவாளநகர் போஸ்ட் கபிலர் நகர் தீரன் சிவலிங்கம் குறுக்கு தெருவில் உள்ள மின்கம்பத்தில் காங்கீரிட் கம்பிகள் வெளியே தெரிகின்றன. இதனால் எப்போது வேண்டுமானாலும் மின்கம்பம் சரிந்து விழலாம். எனவே, மின்வாரிய அதிகாரிகள் கள ஆய்வு செய்து உரிய நடவடிக்கை எடுக்கவேண்டும்.

-எஸ்.சீனிவாசமூர்த்தி, மணவாளநகர்.