ஓசூரில் மோட்டார் சைக்கிள் கவிழ்ந்து கல்லூரி மாணவர் சாவு நண்பர் படுகாயம்

ஓசூர்:

ஓசூரில் மோட்டார் சைக்கிள் கவிழ்ந்து கல்லூரி மாணவர் இறந்தார். உடன் சென்ற நண்பர் படுகாயம் அடைந்தார்.

ஓசூர் மூக்கண்டப்பள்ளி பகுதியை சேர்ந்த ரவி. இவருடைய மகன் லோகேஷ் (வயது 23). இவர் ஓசூரில் உள்ள தனியார் கல்லூரியில் எம்.சி.ஏ. 2-ம் ஆண்டு படித்து வந்தார். அதேபகுதியை சேர்ந்தவர் சிவா (21). இவர் ஓசூர் அரசு ஐ.டி.ஐ.யில் டிப்ளமோ 2-ம் ஆண்டு படித்து வருகிறார்.

சம்பவத்தன்று நண்பர்களான இவர்கள் 2 பேரும் மோட்டார் சைக்கிளில் ஓசூர் ராமநாயக்கன் ஏரி பக்கமுள்ள ஜலகண்டேஸ்வரர் கோவில் அருகே சென்று கொண்டு இருந்தனர். அப்போது எதிர்பாராதவிதமாக மோட்டார் சைக்கிள் கவிழ்ந்தது. 

இந்த விபத்தில் தலையில் பலத்த அடிபட்டு லோகேஷ், சம்பவ இடத்திலேயே உயிரிழந்தார். சிவா படுகாயம் அடைந்தார். அக்கம் பக்கத்தினர் அவரை மீட்டு மருத்துவமனையில் சேர்த்தனர். அங்கு அவருக்கு தீவிர சிகிச்சை அளிக்கப்பட்டு வருகிறது.

இந்த விபத்து குறித்து தகவல் அறிந்ததும் ஓசூர் டவுன் போலீசார் விரைந்து சென்று லோகேசின் உடலை கைப்பற்றி பிரேத பரிசோதனைக்காக ஓசூர் அரசு மருத்துவமனைக்கு அனுப்பி வைத்தனர். விபத்து குறித்து போலீசார் வழக்குப்பதிவு செய்து விசாரணை நடத்தி வருகிறார்கள்.