சாலை விபத்தில் முதியவர் உள்பட 2 பேர் பலி

கரூர் மாவட்டம், குளித்தலை அருகே உள்ள ராஜேந்திரம் மேல குடித்தெரு பகுதியை சேர்ந்தவர் ராஜன் (வயது 50). இவர், சம்பவத்தன்று குளித்தலை அருகே உள்ள வீரம்பூர் பகுதியை சேர்ந்த வடிவேல் (51) என்பவருடன் தீபாவளிக்கு பொருட்கள் வாங்குவதற்காக குளித்தலை வந்து விட்டு பின்னர் மீண்டும் தங்களது ஊருக்கு மோட்டார் சைக்கிளில் சென்று கொண்டிருந்தார். 

தண்ணீர்பள்ளி பஸ் நிறுத்தம் அருகே சென்று கொண்டிருந்தபோது எதிரே வந்த மற்றொரு மோட்டார் சைக்கிளில் மோதாமல் இருப்பதற்காக வடிவேல் தான் ஓட்டிவந்த மோட்டார் சைக்கிளை நிறுத்த முயற்சிக்கும்போதுதவறி கீழே விழுந்துள்ளனர். இதில் படுகாயமடைந்த ராஜன் சம்பவ இடத்திலேயே பரிதாபமாக இறந்தார். வடிவேல் காயமடைந்தார். இந்த விபத்து குறித்து குளித்தலை போலீசார் வழக்குப்பதிவு செய்து விசாரணை நடத்தி வருகின்றனர்.

குளித்தலை பெரிய பாலம் மலையப்ப நகரை சேர்ந்தவர் ராமசாமி (65). கூலிதொழிலாளியான இவர், நேற்று முன்தினம் சுக்காலியூர் அருகே உள்ள ஆட்டையும் பரப்பு பஸ் நிலையம் அருகே நடந்து சென்று கொண்டிருந்தார். அப்போது அந்த வழியாக வந்த அடையாளம் தெரியாத வாகனம் ஒன்று ராமசாமி மீது மோதி விட்டு நிற்காமல் சென்று விட்டது. 

இதில் தலையில் பலத்த காயம் அடைந்த ராமசாமி சம்பவ இடத்திலேயே பரிதாபமாக இறந்தார். இதுகுறித்து தகவல் அறிந்த தாந்தோணிமலை போலீஸ் இன்ஸ்பெக்டர் சிவசங்கரி வழக்குப்பதிந்து, ராமசாமி உடலை கைப்பற்றி பிரேத பரிசோதனைக்காக கரூர் அரசு மருத்துவக்கல்லூரி மருத்துவமனைக்கு அனுப்பி வைத்து விசாரணை நடத்தி வருகிறார்.