மழையால் வீடு இடிந்து விழுந்தது

கோத்தகிரி

கோத்தகிரி அருகே மழையால் வீடு இடிந்து விழுந்தது. இதில் சிறுவன் உள்பட 3 பேர் பத்திரமாக மீட்கப்பட்டனர்.

கோத்தகிரி அருகே உள்ள காக்காசோலை கிராமத்தை சேர்ந்தவர் சுந்தரம்(வயது 66). கூலி தொழிலாளி. இவருடைய மனைவி ராஜேஸ்வரி(57). இவர்களது மகன் ஆனந்த ராஜ். இவரது மனைவி சுமதி. இந்த தம்பதிக்கு தமிழ்கதிர்(4) என்ற மகன் இருக்கிறான். இவர்கள் 5 பேரும் ஒரே வீட்டில் வசித்து வருகின்றனர். 

இந்த நிலையில் அந்த வீட்டின் விரிவாக்க பணி நடைபெற்று வந்தது. முன்பக்கம் பணிகள் நடைபெறுவதால், பின்பக்கம் உள்ள 2 அறைகளில் தங்கினர். கடந்த 3-ந் தேதி இரவில் சுந்தரம், ராஜேஸ்வரி மற்றும் தமிழ்கதிர் ஆகியோர் ஒரு அறையிலும், ஆனந்தராஜ், சுமதி ஆகியோர் மற்றொரு அறையிலும் தூங்கினர். 

இதற்கிடையில் கோத்தகிரி மற்றும் அதன் சுற்றுவட்டார பகுதிகளில் பரவலாக மழை பெய்தது. இதனால் நேற்று முன்தினம் அதிகாலை 2 மணியளவில் திடீரென சுந்தரம், ராஜேஸ்வரி, தமிழ்கதிர் ஆகியோர் தங்கி இருந்த அறையின் ஒரு பக்க சுவர் திடீரென இடிந்து விழுந்தது. இதனால் அவர்கள் 3 பேரும் இடிபாடுகளுக்குள் சிக்கி வெளியே வர முடியாமல் தவித்தனர்.

இதுகுறித்து கோத்தகிரி போலீசார் மற்றும் தீயணைப்பு துறையினருக்கு தகவல் தெரிவிக்கப்பட்டது. அதன்பேரில் விரைந்து வந்த அவர்கள் 3 பேரையும் பத்திரமாக மீட்டனர். பின்னர் கோத்தகிரி அரசு ஆஸ்பத்திரிக்கு அனுப்பி வைக்கப்பட்டு, அவர்களுக்கு ஏற்பட்டு இருந்த லேசான காயத்துக்கு சிகிச்சை அளிக்கப்பட்டது.