திருச்செந்தூர் சுப்பிரமணிய சுவாமி கோவில் கந்தசஷ்டி திருவிழாவில் யாகசாலையில் எழுந்தருளிய சுவாமி ஜெயந்திநாதருக்கு சிறப்பு தீபாராதனை

திருச்செந்தூர் சுப்பிரமணிய சுவாமி கோவிலில் கந்தசஷ்டி திருவிழா யாகசாலை பூஜையுடன் தொடங்கியது.

முருக பெருமானின் அறுபடை வீடுகளில் 2-ம் படை வீடான திருச்செந்தூர் சுப்பிரமணிய சுவாமி கோவிலில் ஆண்டுதோறும் கொண்டாடப்படும் பல்வேறு திருவிழாக்களில் கந்தசஷ்டி திருவிழா சிறப்பு வாய்ந்தது ஆகும். கோவிலில் இந்த ஆண்டு கந்தசஷ்டி திருவிழா நேற்று முன்தினம் தொடங்கியது. இதையொட்டி அதிகாலை 1 மணிக்கு நடை திறக்கப்பட்டு, விசுவரூப தீபாராதனை, உதய மார்த்தாண்ட அபிஷேகம், தீபாராதனை நடைபெற்றது.

பின்னர் சுவாமி ஜெயந்திநாதர் வள்ளி- தெய்வானை அம்பாள்களுடன் யாகசாலையில் எழுந்தருளினார். யாகசாலையில் சுவாமி ஜெயந்திநாதர், வள்ளி-தெய்வானை ஆகியோருக்கு பிரதான 3 கும்பங்கள் வைக்கப்பட்டு இருந்தது. மேலும் சிவன்-பார்வதி உள்பட பரிவாரமூர்த்தி கும்பங்களும் வைக்கப்பட்டு இருந்தது. காப்பு கட்டிய ஹரிகர சிவாச்சாரியார் தாம்பூலத்தை கோவில் இணை ஆணையர் (பொறுப்பு) குமரதுரை, தக்கார் பிரதிநிதியும், ஓய்வுபெற்ற கால்நடைத்துறை உதவி இயக்குனருமான பாலசுப்பிரமணிய ஆதித்தன் ஆகியோரிடம் பெற்று யாகசாலை பூஜையை தொடங்கினார்.

2-ம் திருநாளான நேற்று அதிகாலை 3 மணிக்கு கோவில் நடை திறக்கப்பட்டு, விசுவரூப தீபாராதனை, உதய மார்த்தாண்ட அபிஷேகம், தீபாராதனை நடைபெற்றது. கோவில் மூலவர் மற்றும் சண்முகருக்கு உச்சிகால பூஜை நடந்த பின்னர் யாகசாலையில் உள்ள சுவாமி ஜெயந்திநாதருக்கு சிறப்பு தீபாராதனை நடைபெற்றது.

தொடர்ந்து சுவாமி ஜெயந்திநாதர் வள்ளி-தெய்வானையுடன் யாகசாலையில் இருந்து தங்க சப்பரத்தில் கோவில் உள்பிரகாரத்தில் உள்ள 108 மகா தேவர் சன்னதி முன்பாக எழுந்தருளினார். அங்கு சுவாமிக்கு தீபாராதனை நடைபெற்றது. மாலையில் சுவாமி ஜெயந்திநாதர், வள்ளி-தெய்வானைக்கு அபிஷேகம் அலங்காரமாகி தீபாராதனை நடந்தது.

விழாவையொட்டி தமிழகத்தின் பல்வேறு பகுதிகளில் இருந்தும் ஏராளமான பக்தர்கள் கோவிலுக்கு வந்தனர். கோவில் கலையரங்கம் அருகில் அமைக்கப்பட்ட தற்காலிக கூடாரங்களில் பக்தர்களை அமர வைத்து சமூக இடைவெளியுடன் தரிசனத்துக்கு அனுமதித்தனர். அதிகாலை 5 மணி முதல் இரவு 8 மணி வரையிலும் கோவிலில் பக்தர்கள் சாமி தரிசனம் செய்தனர்.

கோவிலுக்கு முதலில் நேரடியாக வந்த 5 ஆயிரம் பக்தர்களும், ஆன்லைன் மூலம் முன்பதிவு செய்த 5 ஆயிரம் பக்தர்களும் அனுமதிக்கப்பட்டனர். கோவில் கிரிபிரகாரத்தில் ஏராளமான  பெண்கள் அடிபிரதட்சணம் செய்து நேர்த்திக்கடன் செலுத்தி வழிபட்டனர். சில பக்தர்கள் கோவில் வளாகத்தில் குழுக்களாக அமர்ந்தும் முருக பெருமானின் திருப்புகழை பாடி வழிபட்டனர்.

விழாவின் சிகர நிகழ்ச்சியான சூரசம்ஹாரம், 6-ம் திருநாளான வருகிற 9-ந்தேதி (செவ்வாய்க்கிழமை) 2-வது ஆண்டாகவும் பக்தர்கள் பங்கேற்பின்றி எளிமையாக நடைபெறுகிறது. 7-ம் திருநாளான 10-ந்தேதி (புதன்கிழமை) இரவில் சுவாமி- தெய்வானை அம்பாள் திருக்கல்யாணம் நடைபெறுகிறது.

கொரோனா தடுப்பு நடவடிக்கையாக 6, 7-ம் திருநாட்களில் கோவிலில் சாமி தரிசனத்துக்கு பக்தர்களுக்கு தடை விதிக்கப்பட்டுள்ளது. விழா நிகழ்ச்சிகள் அனைத்தும் யூ-டியூப் இணையதளத்திலும், உள்ளூர் தொலைக்காட்சிகளிலும் நேரலையாக ஒளிபரப்பு செய்யப்படுகிறது. விழா ஏற்பாடுகளை கோவில் தக்கார் இரா.கண்ணன் ஆதித்தன், இணை ஆணையர் (பொறுப்பு) குமரதுரை மற்றும் கோவில் பணியாளர்கள் செய்து வருகின்றனர்.