ஏர்வாடி அருகே வியாபாரி மீது தாக்குதல் நடத்திய 3 பேரை போலீசார் தேடிவருகின்றனர்

திருக்குறுங்குடி நம்பிதோப்பு, ராமானுஜம் புதுத்தெருவை சேர்ந்தவர் பால்ராஜ் மகன் சந்தோஷ்குமார் (வயது 38). இவர் அப்பகுதியில் மளிகை கடை வைத்துள்ளார். சம்பவத்தன்று சந்தோஷ்குமார் தனது கடை முன்பு நின்று கொண்டிருந்தபோது, அதே ஊரைச் சேர்ந்த அருமைநாயகம் ஆடுகளை மேய்த்து வந்து கொண்டிருந்தார். அப்போது தெருவில் நின்ற நாயை விரட்டுவதில் அவர்களுக்குள் தகராறு ஏற்பட்டது. வாக்குவாதம் முற்றியதால் ஆத்திரம் அடைந்த அருமைநாயகம், அவரது மகன்கள் கிங்ஸ்லிராஜன், ராபின் ஆகியோர் சேர்ந்து சந்தோஷ்குமாரை அவதூறாக பேசி தாக்கினர். இதில் காயம் அடைந்த அவர் நாங்குநேரி அரசு ஆஸ்பத்திரியில் அனுமதிக்கப்பட்டார். இதுபற்றிய புகாரின் பேரில் திருக்குறுங்குடி போலீசார் வழக்குப்பதிவு செய்து அருமைநாயகம் மற்றும் அவரது மகன்கள் கிங்ஸ்லிராஜன், ராபின் ஆகிய 3 பேரையும் தேடி வருகின்றனர்.