பள்ளி மாணவ- மாணவிகளுக்கான போட்டிகள்

பெரம்பலூர்:

பெரம்பலூர் மாவட்ட பள்ளி கல்வித்துறையின் முதன்மை கல்வி அதிகாரி அறிவழகன் வழிகாட்டுதலின்பேரில், ஒருங்கிணைந்த பள்ளிக்கல்வி சார்பில் 2021-22 கல்வி ஆண்டிற்கான பள்ளி மாணவ-மாணவிகளுக்கு கலா உத்சவ் மாவட்ட அளவிலான போட்டிகள் நேற்று நடந்தன. பெரம்பலூர் தந்தை ஹேன்ஸ் ரோவர் மேல்நிலைப்பள்ளியில் நடந்த இந்த போட்டிகளை கல்வி மாவட்ட அலுவலர்கள் சண்முகம் (பெரம்பலூர்), ஜெகநாதன் (வேப்பூர்) ஆகியோர் தொடங்கி வைத்தனர். போட்டிகளில் 9 முதல் 12-ம் வகுப்பு வரை பயிலும் பள்ளி மாணவ-மாணவிகளுக்கு தனித்தனியாக செவ்வியல், பராம்பரிய நாட்டுப்புற வகையில் வாய்ப்பாட்டு இசை, கருவி இசை, நடனம் ஆகிய போட்டிகளும், கோட்டு ஓவியம், வண்ண ஓவியம், அச்சு ஓவியம், சிற்பத்தில் காண்கலை போட்டிகள், உள்ளூர் தொன்மை பொம்மைகள் தயாரிப்பு போட்டி ஆகியவை நடைபெற்றன. 

இதில் அரசு மற்றும் அரசு உதவி பெறும் பள்ளிகள், தனியார் பள்ளிகளை சேர்ந்த மாணவ-மாணவிகள் ஆர்வத்துடன் கலந்து கொண்டு தங்களது திறமைகளை வெளிப்படுத்தினர். போட்டியில் முதல் 3 இடங்களை பிடிக்கும் மாணவ-மாணவிகள் மாநில அளவிலான போட்டிகளில் கலந்து கொள்ள உள்ளனர். அதில் வெற்றி பெறும் மாணவ-மாணவிகள் தேசிய அளவிலான போட்டிகளில் தமிழக அணிக்காக கலந்து கொள்ளவுள்ளனர். வெற்றி பெறுபவர்களுக்கு முதல் பரிசாக ரூ.25 ஆயிரமும், 2-ம் பரிசாக ரூ.20 ஆயிரமும், 3-ம் பரிசாக ரூ.15 ஆயிரமும் மற்றும் கேடயம், பதக்கம், சான்றிதழ்களும் வழங்கப்படவுள்ளது. மாவட்ட அளவிலான போட்டிக்கான ஏற்பாடுகளை ஒருங்கிணைந்த பள்ளிக்கல்வியின் உதவி திட்ட அலுவலர் ராஜா, மாவட்ட ஒருங்கிணைப்பாளர் குமார் ஆகியோர் செய்திருந்தனர்.