லாரியில் ரேஷன் அரிசி கடத்தல்; 2 வாலிபர்கள் கைது

நெல்லை,:

நெல்லை மாவட்ட உணவு கடத்தல் தடுப்பு பிரிவு போலீஸ் இன்ஸ்பெக்டர் கோட்டைச்சாமி மற்றும் போலீசார் நேற்று வள்ளியூர் அருகே நான்கு வழிச்சாலையில் வாகன சோதனையில் ஈடுபட்டனர்.அப்போது அந்த வழியாக வந்த ஒரு லாரியை மறித்து சோதனை செய்தனர். அதில் 270 மூட்டைகளில், 13 ஆயிரத்து 500 கிலோ ரேஷன் அரிசி இருந்தது தெரியவந்தது. 

உடனே போலீசார் லாரி டிரைவர் மற்றும் அதில் இருந்தவரிடம் விசாரணை நடத்தினர். விசாரணையில், அவர்கள் கன்னியாகுமரி பகுதியை சேர்ந்த சுரேஷ் (வயது 34), சஜீத் (24) என்பதும், ரேஷன் அரிசியை கடத்தி வந்ததும் தெரியவந்தது.

இதையடுத்து போலீசார் அவர்களை கைது செய்து ரேஷன் அரிசியை லாரியுடன் பறிமுதல் செய்தனர். மேலும் இந்த கடத்தலில் தொடர்புடைய நெல்லையை சேர்ந்த இசக்கிமுத்து உள்பட 2 பேரை தேடி வருகிறார்கள்.