தினத்தந்தி புகார் பெட்டி

‘தினத்தந்தி’ புகார் பெட்டிக்கு 89396 58888 என்ற ‘வாட்ஸ்-அப்’ எண்ணில் வந்துள்ள மக்கள் குறைகள் தொடர்பான பதிவுகள் வருமாறு:-

பழனி 13-வது வார்டு பொன்காளியம்மன் கோவில் தெருவில் கடந்த சில நாட்களாக தெருவிளக்கு எரியவில்லை. இரவில், அந்த பகுதி முழுவதும் இருள் சூழ்ந்து காணப்படுகிறது. இதனால் பெண்கள் அச்சத்துடன் நடமாடும் நிலை உள்ளது. எனவே தெருவிளக்குகளை சரிசெய்து எரிய வைக்க வேண்டும். -சுப்புராஜ், பழனி.

தேனி 22-வது வார்டு பவர்அவுஸ் தெருவில் குப்பைகள் குவிந்து கிடக்கின்றன. அதேபோல் சாக்கடை கால்வாயில் அடைப்பு ஏற்பட்டு துர்நாற்றம் வீசுகிறது. இதனால் கொசுத்தொல்லையும் அதிகமாக இருக்கிறது. எனவே, குப்பைகளை அகற்றி சாக்கடை கால்வாயை தூர்வார வேண்டும். 

-நாகதேவி, தேனி.

பழனி அருகே சிவகிரிபட்டி எம்.ஜி.ஆர்.நகர், திருநகர் பகுதிகளில் கடந்த சில நாட்களாக தினமும் அடிக்கடி மின்தடை ஏற்படுகிறது. இதனால் மாணவ-மாணவிகள் படிக்க முடியவில்லை. பெண்கள் வீட்டு வேலைகளை செய்ய முடியவில்லை. எனவே, மின்தடை ஏற்படாமல் சீராக மின்சாரம் வினியோகம் செய்ய நடவடிக்கை எடுக்க வேண்டும். 

-பாலசுப்பிரமணியன், எம்.ஜி.ஆர்.நகர்.

திண்டுக்கல் நாகல்நகரில் ரெயில் நிலையம் செல்லும் சாலை சேதம் அடைந்து பள்ளம் உருவாகிவிட்டது. சாரல் மழைக்கே மழைநீர் குளம் போல் தேங்கி நிற்கிறது. இதனால் பள்ளம் தெரியாமல் வாகனங்களில் செல்வோர் தடுமாறி விழுந்து விடுகின்றனர். இதனை சரிசெய்வதற்கு உரிய நடவடிக்கை எடுப்பார்களா? 

-ராஜேஸ்கண்ணன், திண்டுக்கல்.

உத்தமபாளையத்தில் கோட்டைமேடு பகுதியில் கடந்த சிலநாட்களாக முறையாக குடிநீர் வருவதில்லை. மேலும் தெரு குழாய்க்கான மின்மோட்டாரும் பழுதாகி விட்டது. இதனால் குடிநீர் தட்டுப்பாடு ஏற்பட்டு மக்கள் சிரமப்படுகின்றனர். எனவே தினமும் குடிநீர் கிடைப்பதற்கு சம்பந்தப்பட்ட அதிகாரிகள் உரிய நடவடிக்கை எடுக்க வேண்டும். 

-பக்ருதீன், உத்தமபாளையம்.

போடி மேலசொக்கநாதபுரத்தில் பாதாள சாக்கடை பணியால் சாலை குண்டும், குழியுமாக மாறிவிட்டது. மழைக்காலத்தில் குளம் போல் மழைநீர் தேங்கி நிற்கிறது. இதனால் இருசக்கர வாகனங்கள் உள்பட அனைத்து வாகனங்களும் விபத்தில் சிக்குகின்றன. இதை தடுக்க சேதம் அடைந்த சாலையை சீரமைக்க வேண்டும்.

-பிரகாஷ், போடி.