பள்ளி மாணவ-மாணவிகளுக்கு பிளஸ்-2 மதிப்பெண் சான்றிதழ் வினியோகம் தொடக்கம்

தூத்துக்குடி:

தூத்துக்குடி மாவட்டத்தில் பிளஸ்-2 மதிப்பெண் சான்றிதழ் வினியோகம் நேற்று தொடங்கியது.

கொரோனா தொற்று காரணமாக தமிழகத்தில் இந்த ஆண்டு பிளஸ்-2 தேர்வு ரத்து செய்யப்பட்டது. தூத்துக்குடி மாவட்டத்தில் இந்த ஆண்டு 9 ஆயிரத்து 53 மாணவர்கள், 10 ஆயிரத்து 999 மாணவிகள் ஆக மொத்தம் 20 ஆயிரத்து 52 பேர் பிளஸ்-2 தேர்வு எழுத பதிவு செய்து இருந்தனர். இவர்களுக்கு எஸ்.எஸ்.எல்.சி, பிளஸ்-1 வகுப்புகளில் எடுத்த மதிப்பெண் மற்றும் பிளஸ்-2 செய்முறை தேர்வு மதிப்பெண் அடிப்படையில் பிளஸ்-2 மதிப்பெண் கணக்கிடப்பட்டு உள்ளது. இந்த மதிப்பெண் விவரங்களை தமிழக பள்ளி கல்வித்துறை கடந்த ஜூலை 19-ம் தேதி வெளியிட்டது. இதைத் தொடர்ந்து பிளஸ்-2 மாணவர்களுக்கான தற்காலிக மதிப்பெண் சான்றிதழ் கடந்த ஜூலை 22-ம் தேதி இணையதளத்தில் வெளிடப்பட்டது. இந்த தற்காலிக மதிப்பெண் சான்றிதழை மாணவர்கள் பதிவிறக்கம் செய்து நீட், பொறியியல் போன்ற மேல்படிப்புகளுக்கு விண்ணப்பித்தனர். மேலும், பல கல்லூரிகளில் இந்த தற்காலிக மதிப்பெண் அடிப்படையில் மாணவர் சேர்க்கையும் நடந்து முடிந்து உள்ளது.

இந்த நிலையில் பிளஸ்-2 மாணவர்களுக்கான அசல் மதிப்பெண் சான்றிதழ்கள் அச்சிடப்பட்டு பள்ளி கல்வித்துறை சார்பில் மாவட்ட முதன்மை கல்வி அலுவலகம் மற்றும் மாவட்ட கல்வி அலுவலகங்கள் மூலம் அந்தந்த பள்ளிகளுக்கு அனுப்பி வைக்கப்பட்டன. தொடர்ந்து பிளஸ் 2 மாணவர்களுக்கான அசல் மதிப்பெண் சான்றிதழ் அந்தந்த பள்ளிகளில் செப்டம்பர் 17-ம் தேதி முதல் வினியோகம் செய்யப்படும் என தமிழக பள்ளிக் கல்வித் துறை அறிவித்து இருந்தது.

வினியோகம் 

அதன்படி நேற்று தூத்துக்குடி மாவட்டத்தில் உள்ள அனைத்து பள்ளிகளிலும் பிளஸ்-2 அசல் மதிப்பெண் சான்றிதழ் வினியோகம் நேற்று தொடங்கியது. மாணவ, மாணவிகள் தாங்கள் படித்த பள்ளிகளுக்கு சென்று அசல் மதிப்பெண் சான்றிதழ்களை ஆர்வமுடன் பெற்றுச் சென்றனர். அந்தந்த பள்ளி தலைமை ஆசிரியர்கள் மதிப்பெண் சான்றிதழ்களை மாணவ, மாணவியருக்கு வழங்கினர். 

மேலும், மாணவர்களது பிளஸ்-2 கல்வி தகுதியை வேலைவாய்ப்பு அலுவலகங்களில் ஆன்லைன் மூலம் பதிவு செய்யும் பணிகளும் அந்தந்த பள்ளிகளில் நடந்தது. ஏற்கனவே எஸ்எஸ்எல்சி கல்வி தகுதியை பதிவு செய்த மாணவ, மாணவியர் அந்த ஆவணங்களை பயன்படுத்தி பிளஸ் 2 கல்வித் தகுதியை பதிவு செய்தனர். இதற்காக அனைத்து பள்ளிகளிலும் வசதிகள் செய்யப்பட்டிருந்தன.

கோவில்பட்டி அரசு மகளிர் மேல்நிலைப்பள்ளியில் பிளஸ்-2 மாணவிகளுக்கு அசல் மதிப்பெண் சான்றிதழ் வழங்கும் நிகழ்ச்சி நடந்தது. இதில் பள்ளி தலைமை ஆசிரியர் ரூத் ரத்தினகுமாரி தலைமையில் ஆசிரியர்கள் 405 மாணவிகளுக்கு மதிப்பெண் சான்றிதழ்களை வழங்கினர்.

இதேபோல நாடார் மேல்நிலைப்பள்ளியில் பிளஸ்-2 மாணவர்கள் 364 பேருக்கு அசல் மதிப்பெண் சான்றிதழ் வழங்கும் நிகழ்ச்சி தலைமை ஆசிரியர் ஜான் கணேஷ் தலைமையில் நடந்தது. இதில் 171 மாணவர்கள் மதிப்பெண் சான்றிதழ்களை பெற்றனர்.