அறந்தாங்கியில் தொழிலாளி கொலை வழக்கில் 3 பேர் கைது

புதுக்கோட்டை மாவட்டம், அறந்தாங்கி அருகே வைரிவயல் ஏரியில் கடந்த சில நாட்களுக்கு முன் அறந்தாங்கி எல்.என்.புரத்தை சேர்ந்த தொழிலாளியான தீபராஜ் (வயது 40) என்பவர் தலையில் வெட்டு காயத்துடன் பிணமாக கிடந்தார். இதையடுத்து அறந்தாங்கி போலீசார் உடலை கைப்பற்றி பிரேத பரிசோதனைக்காக அறந்தாங்கி அரசு மருத்துவமனைக்கு அனுப்பி வைத்தனர். மேலும் தீபராஜ் மீது ஏற்கனவே அறந்தாங்கி போலீஸ் நிலையத்தில் கஞ்சா வழக்கு உள்ளது. இதுகுறித்து போலீசார் வழக்குப்பதிவு செய்து தீபராஜை யாரும் கொலை செய்தனரா? என்பது உள்பட பல்வேறு கோணங்களில்  தீவிரமாக விசாரணை நடத்தி வந்தனர். இதில் அறந்தாங்கி இந்திரா நகரை சேர்ந்த சூர்யா (27), ஜேசுராஜா (31), பட்டுக்கோட்டை தங்கவேல் நகரை சேர்ந்த அன்பரசன் (24) ஆகிய 3 பேரையும் பிடித்து விசாரணை நடத்தினர். விசாரணையில், பணம் கொடுக்கல் வாங்கல் தகராறில் தீபராஜை கொலை செய்ததாக அவர்கள் போலீசில் தெரிவித்தனர். இதையடுத்து அறந்தாங்கி போலீசார் 3 பேரையும் கைது செய்து விசாரணை நடத்தி வருகின்றனர்.