நாய்கள் கடித்து 13 ஆடுகள் சாவு

ஆலங்குளம், 

ஆலங்குளம் அருகே நாய்கள் கடித்து 13 ஆடுகள் இறந்தன. 

ஆலங்குளம் அருகே உப்பு பட்டி கிராமத்தை சேர்ந்தவர் முத்துமாரி. இவர் ஆடுகள் வாங்கி மேய்க்கும் தொழில் செய்து வருகின்றார்.

 இந்த செம்மறி ஆடுகளை வீரபாண்டி என்பவரின் புன்செயில் உரத்துக்காக கிடைபோட்டு இருந்தார். இரவில் ஜமீன் கல்லமநாயக்கர்பட்டி, மாதாங்கோவில்பட்டி வீடுகளில் வளர்க்கும் வேட்டைநாய்கள் கிடையில் இருந்த 5 பெரிய ஆடுகள், 8 குட்டிகளை கொன்றது. 

10 ஆடுகள் படுகாயம் ஏற்பட்டது. இதையடுத்து காயம் அடைந்த ஆடுகளுக்கு கால்நடை டாக்டர் முதலுதவி செய்தார். இந்த சம்பவம் குறித்து ஆலங்குளம் சப் -இன்ஸ்பெக்டர் பாபுராஜ் வழக்குப்பதிவு செய்து விசாரணை நடத்தி வருகின்றார். 

இந்த பகுதியில் நாய்கள் தொல்லை நாளுக்கு நாள் அதிகரித்து வருவதாகவும், இதனால் பொதுமக்கள் மட்டுமின்றி கால்நடைகளும் சிரமப்பட்டு வருகின்றன. எனவே இதுகுறித்து சம்பந்தப்பட்ட அதிகாரிகள் நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.