தோட்டத்துக்குள் பதுங்கியிருந்த 7 அடி நாகப்பாம்பு

பழனி:

பழனி அருகே உள்ள அய்யம்புள்ளி பகுதியை சேர்ந்தவர் பழனிசாமி. விவசாயி. இவருக்கு, அதே பகுதியில் தோட்டம் உள்ளது. அந்த தோட்டத்தில் உள்ள மோட்டார் அறைக்குள் 7 அடி நீள நாகப்பாம்பு நேற்று புகுந்தது. இதனை அங்கு வேலை செய்து கொண்டிருந்த தொழிலாளர்கள் பார்த்து அதிர்ச்சி அடைந்தனர்.

 இதுகுறித்து பாம்பு பிடிக்கும் நபர் முகேசுக்கு தகவல் தெரிவிக்கப்பட்டது.

அதன்பேரில் அவர் சம்பவ இடத்துக்கு விரைந்தார். பின்னர் அவர், மோட்டார் அறையில் பதுங்கி இருந்த நாகப்பாம்பை லாவகமாக உயிருடன் பிடித்தார். அதன்பிறகு அந்த பாம்பு, பழனி வனத்துறையினரிடம் ஒப்படைக்கப்பட்டது. அதனை அவர்கள் வனப்பகுதியில் விட்டனர்.