300 நகைக்கடைகளை அடைத்து வியாபாரிகள் ஆர்ப்பாட்டம்

நகைக்கடைகள் மூலம் விற்கப்படும் தங்க நகைகளுக்கு, இனி புதிய ஹால்மார்க் தர அடையாள எண் கொண்ட நிரந்தர முத்திரை பெற வேண்டும் என்பதை இந்திய தர நிர்ணய ஆணையம் கட்டாயமாக்கி உள்ளது.
நகைகளில் ஹால்மார்க் முத்திரை என்ற விதியை வரவேற்கிறோம். ஆனால், ஹால்மார்க் அடையாள எண்ணை கொண்டு வர வேண்டும் என்பதை எதிர்க்கிறோம். ஒரு நகையை தயார் செய்து அதில் ஹால்மார்க் முத்திரை பதிப்பு மற்றும் தனி ஹால்மார்க் அடையாள எண் பதிவு செய்து விற்பனைக்கு கொண்டுவர 2 வாரம் காலம் ஆகும்.
இதனால், தங்க நகைகள் தேங்கி விற்பனை கடுமையாக பாதிப்பதோடு, விலையும் அதிகரிக்கும் ஆபத்து உள்ளது.
எனவே, மத்திய அரசு கொண்டுவந்துள்ள இந்த புதிய முறைக்கு எதிர்ப்பு தெரிவித்து ராமநாதபுரம் மாவட்டத்தில் தங்கம், வெள்ளி நகை வியாபாரிகள் மற்றும் பான் புரோக்கர்கள் தங்களின் கடைகளை நேற்று காலை 9 மணி முதல் 11.30 மணி வரை கடைகளை அடைத்து அறவழியில் எதிர்ப்பை தெரிவித்தனர்.
இதன்படி மாவட்டத்தில் 300 நகைக்கடைகள் மேற்கண்ட நேரத்தில் அடைக்கபட்டிருந்தன.
மத்திய அரசு இந்த பிரச்சினையில் உரிய முடிவு எடுக்காவிட்டால் அடுத்தகட்ட தொடர் போராட்டத்தில் ஈடுபட முடிவு செய்யப்படும் என்று ராமநாதபுரம் தங்கம், நகை வியாபாரிகள் சங்கத் தலைவர் ரவீந்திரன், செயலாளர் லட்சுமணன் உள்ளிட்ட நிர்வாகிகள் தெரிவித்தனர்.