புளியமரத்தில் வேன் மோதி டிரைவர் சாவு

சரவணம்பட்டி

தமிழக -கர்நாடக எல்லையில் உள்ள சாம்ராஜ் நகரை சேர்ந்தவர் அம்மையப்பா (வயது42). 

இவர் தனது தோட்டத்தில் விளைந்த காய்கறி களை டெம்போ வேனில் ஏற்றி கோவை நோக்கி குரும்பபாளையத்தில் உள்ள ஒரு திருமண மண்டபம் அருகே வந்து கொண்டு இருந்தார். 

வேனை டிரைவர் முத்துராஜ் (38) என்பவர் ஓட்டினார். அப்போது அவர், முன்னால் சென்ற வாகனத்தை முந்த முயன்றார். 

அந்த நேரத்தில் திடீரென்று எதிரே மற்றொரு வாகனம் வந்தது.

இதனால் அதிர்ச்சி அடைந்த முத்துராஜ், வேனை திரும்ப முயன்ற போது எதிர்பாராதவிதமாக சாலையோரத்தில் இருந்த புளியமரத்தில் மோதினார். இதில் படுகாயம் அடைந்த முத்துராஜ் சம்பவ இடத்திலேயே உயிரிழந்தார்.

 படுகாயம் அடைந்த அம்மையப்பாவை அங்கிருந்தவர்கள் மீட்டு கோவை அரசு மருத்துவமனைக்கு அனுப்பி வைத்தனர். 

இது குறித்த புகாரின் பேரில் கோவில்பாளையம் போலீசார் விரைந்து வந்து முத்துராஜின் உடலை மீட்டு பிரேத பரிசோதனைக்காக கோவை அரசு மருத்துவமனைக்கு அனுப்பி வைத்தனர். 

இது குறித்து போலீசார் வழக்கு பதிவு செய்து விசாரணை நடத்தி வருகின்றனர்.