மானாமதுரை அருகே ஒரே கிராமத்தில் அடுத்தடுத்த நாட்களில் 40 ஆடுகள் செத்தன

மானாமதுரை அருகே சின்னகண்ணனூர் ஊராட்சிக்கு உட்பட்டது புலிக்குளம் கிராமம். இந்த கிராம மக்களின் முக்கிய தொழிலாக விவசாயம் உள்ளது.மேலும் பெரும்பாலானோர் ஆடு, மாடு உள்ளிட்டவைகளை வளர்த்து வருகி்ன்றனர்.
இந்த நிலையில் கடந்த சில நாட்களாக பெரும்பாலானோரின் ஆடுகள் திடீர், திடீரென செத்து விழுந்தன.இதனால் கால்நடை வளர்ப்போர் அதிர்ச்சிக்குள்ளானார்கள்.
நானும் 40-க்கும் மேற்பட்ட ஆடுகளை வளர்த்து வருகிறேன். ஆடுகளை தினமும் வீட்டில் இருந்து மேய்ச்சலுக்கு அழைத்து சென்று விட்டு பின்னர் மாலையில் வீட்டிற்கு அழைத்து வந்து பட்டியில் அடைத்து விடுவோம். எனக்கு சொந்தமான ஏராளமான ஆடுகளும் கடந்த சில நாட்களாக திடீர், திடீரென்று செத்து விழுந்தன. ஆடுகள் திடீரென்று செத்ததால் என்ன செய்வது என்று தெரியாமல் அதிர்ச்சி அடைந்தேன். இன்னும் சில ஆடுகள் இறக்கும் தருவாயில் உள்ளது. என் ஆடுகளை போல கிராமத்தில் பலரது ஆடுகளும் கடந்த சில நாட்களாக செத்து விட்டன.
இறந்த ஆடுகள் நோய் எதுவும் தாக்கி இறந்ததா? என்பதை கால்நடைத்துறையினர் ஆய்வு செய்ய வேண்டும். அதோடு எங்களுக்கு வாழ்வாதாரம் ஆடுகள் தான். அந்த ஆடுகளை இப்போது நாங்கள் இழந்து உள்ளோம். எனவே எங்களுக்கு இழப்பீடு வழங்க அரசு நடவடிக்கை எடுக்க வேண்டும். எங்கள் வாழ்வாதாரத்தை காப்பாற்ற வேண்டும்.
இது தொடர்பாக காரைக்குடி கால்நடை இணை இயக்குனர்(பொறுப்பு) சஞ்சீவியிடம் கேட்ட போது அவர் கூறியதாவது:-
ஒரே கிராமத்தில் அடுத்தடுத்த நாட்களில் தொடர்ந்து ஆடுகள் இறந்த சம்பவம் குறித்து இதுவரை எங்களுக்கு தகவல் யாரும் தெரிவிக்கவில்லை. நாளை(அதாவது இன்று) சம்பந்தப்பட்ட கிராமத்துக்கு கால்நடைத்துறையினர் நேரில் சென்று கடந்த சில நாட்களில் இறந்த ஆடுகள் நோய் தாக்கி இறந்ததா? என்பது குறித்து ஆய்வு நடத்துவோம். கால்நடை வளர்ப்போர் தங்களுடைய ஆடு, மாடுகளுக்கு ஏதாவது நோய் தாக்கி அறிகுறி தெரிந்தால் உடனே கால்நடைத்துறையை அணுக முன் வர வேண்டும். அப்போது தான் கால்நடைகள் நோய் தாக்கி இறப்பதை தடுக்க முடியும். தற்போது ஒரே கிராமத்தில் அதிகமான ஆடுகள் இறந்த தகவல் கிடைத்து இருப்பதால் அது பற்றி நேரில் சென்று விசாரணை நடத்துவோம். நோய் தாக்குதலில் உள்ள மற்ற ஆடுகளை காப்பாற்றவும் நடவடிக்கை எடுக்க உள்ளோம்.
இவ்வாறு அவர் கூறினார்.