வெவ்வேறு சம்பவங்களில் 2 பேர் தற்கொலை

அச்சன்புதூர்:

கடையநல்லூர் அருகே மேலக்கடையநல்லூர் இந்திரா காலனியை சேர்ந்தவர் சுடலை (வயது 42), ஆட்டோ டிரைவர். இவருக்கும், மனைவிக்கும் இடையே குடும்பத்தகராறு இருந்து வந்ததாக கூறப்படுகிறது. இதனால் மனமுடைந்த சுடலை, நேற்று முன்தினம் இரவு வீட்டில் தூக்குப்போட்டு தற்கொலை செய்து கொண்டார். இதுகுறித்து தகவலறிந்ததும் கடையநல்லூர் போலீசார் சம்பவ இடத்துக்கு சென்று, அவரது உடலை கைப்பற்றி பரிசோதனைக்காக கடையநல்லூர் அரசு ஆஸ்பத்திரிக்கு அனுப்பி வைத்தனர்.

இதேபோல் அதே பகுதியை சேர்ந்தவர் துரை (44), கூலி தொழிலாளி. இவருக்கும், மனைவிக்கும் இடையே குடும்ப தகராறு காரணமாக மனைவியை பிரிந்து தனது தாயுடன் வசித்து வந்தார். இந்த நிலையில் நேற்று முன்தினம் இரவு வீட்டில் துரை தூக்குப்போட்டு தற்கொலை செய்து கொண்டார். தகவலறிந்ததும் கடையநல்லூர் போலீசார் அவரது உடலை கைப்பற்றி பரிசோதனைக்காக ஆஸ்பத்திரிக்கு அனுப்பி வைத்தனர். இவ்விரு சம்பவங்கள் குறித்து போலீசார் வழக்குப்பதிவு செய்து விசாரணை நடத்தி வருகின்றனர்.