கண்டமனூர் அருகே தென்னைமரத்தில் மோட்டார்சைக்கிள் மோதி 2 பேர் பலி

தேனி மாவட்டம் சின்னமனூர்அருகே உள்ள ஓடைப்பட்டியை சேர்ந்தவர்கள் முருகன் (வயது 45), சென்னையன் (48), விக்னேஷ்(32). விவசாயிகளான இவர்கள் நேற்று முன்தினம் மதுரை மாவட்டம் சீலநாயக்கன்பட்டியில் நடைபெற்ற உறவினர் வீட்டு திருமணத்திற்காக சென்றிருந்தனர். 

பின்னர் திருமணம் முடிந்து 3 பேரும் ஒரே மோட்டார்சைக்கிளில் நேற்று முன்தினம் இரவு ஓடைப்பட்டிக்கு திரும்பி வந்து கொண்டு இருந்தனர். மோட்டார்சைக்கிளை விக்னேஷ் ஓட்டினார்.

கடமலைக்குண்டுவை கடந்து கண்டமனூர் அருகே மெயின் ரோட்டில் மோட்டார்சைக்கிள் வந்து கொண்டிருந்தது. அப்போது மோட்டார்சைக்கிள் திடீரென நிலைதடுமாறி சாலையோரம் இருந்த தென்னைமரத்தின் மீது மோதியது. 

இதில் மோட்டார்சைக்கிளில் பின்னால் அமர்ந்து வந்த முருகனுக்கு தலையில் பலத்த காயம் ஏற்பட்டு அவர் சம்பவ இடத்திலேயே பரிதாபமாக உயிரிழந்தார். மோட்டார்சைக்கிளை ஓட்டி வந்த விக்னேஷ் மற்றும் பின்னால் அமர்ந்து வந்த சென்னையன் ஆகியோருக்கு பலத்த காயம் ஏற்பட்டது. 

இதுகுறித்து தகவலறிந்ததும் கடமலைக்குண்டு போலீசார் சம்பவ இடத்திற்கு விரைந்து சென்று முருகனின் உடலை கைப்பற்றி பிரேத பரிசோதனைக்காகவும், விக்னேஷ், சென்னையன் ஆகியோரை மீட்டு சிகிச்சைக்காகவும் தேனி அரசு மருத்துவகல்லூரி மருத்துவமனைக்கு அனுப்பி வைத்தனர். அங்கு இருவருக்கும் தீவிர சிகிச்சை அளிக்கப்பட்டது.

இந்தநிலையில் நேற்று காலை சென்னையன் மேல்சிகிச்சைக்காக மதுரை அரசு மருத்துவமனைக்கு அனுப்பி வைக்கப்பட்டார். ஆனால் அங்கு சிகிச்சை பலனின்றி அவர் பரிதாபமாக உயிரிழந்தார். விக்னேசுக்கு தொடர்ந்து சிகிச்சை அளிக்கப்படுகிறது. 

விபத்து தொடர்பாக கடமலைக்குண்டு போலீசார் வழக்குப்பதிவு செய்து விசாரணை நடத்தி வருகின்றனர்.