தொப்பூர் கணவாயில் சிமெண்டு லாரி கவிழ்ந்து விபத்து; டிரைவர் பலி

நல்லம்பள்ளி:

தொப்பூர் கணவாயில் சிமெண்டு லாரி கவிழ்ந்து விபத்துக்குள்ளானதில் டிரைவர் பலியானார்.

பெங்களூருவில் இருந்து சேலத்திற்கு நேற்று சிமெண்டு பாரம் ஏற்றிக்கொண்டு ஒரு லாரி தர்மபுரி மாவட்டம் தொப்பூர் கணவாய் வழியாக வந்தது. இந்த லாரியை தொப்பூர் பகுதியை சேர்ந்த ரத்தினம் (வயது 52) என்பவர் ஓட்டி வந்தார். சிமெண்டு லாரி தொப்பூர் கணவாயில் உள்ள முதல் வளைவில் வந்தபோது டிரைவரின் கட்டுப்பாட்டை இழந்து சாலையோரத்தில் கவிழ்ந்து விபத்துக்குள்ளானது. 

இந்த விபத்தில் லாரியை ஓட்டி வந்த ரத்தினம் சம்பவ இடத்திலேயே இடிபாடுகளில் சிக்கி உடல் நசுங்கி சம்பவ இடத்திலேயே பரிதாபமாக உயிரிழந்தார். இந்த விபத்து குறித்து தகவல் அறிந்து வந்த தொப்பூர் போலீசார் மற்றும் சுங்கச்சாவடி ரோந்து படையினர் ஒன்றிணைந்து உயிரிழந்த டிரைவர் ரத்தினத்தின் உடலை மீட்டு பிரேத பரிசோதனைக்காக தர்மபுரி அரசு மருத்துவமனைக்கு அனுப்பி வைத்தனர். 

இந்த விபத்தால் தர்மபுரி-சேலம் தேசிய நெடுஞ்சாலையில் சுமார் 2 மணி நேரத்திற்கு மேலாக போக்குவரத்து பாதிப்பு ஏற்பட்டது. இதையடுத்து சுங்கச்சாவடி ரோந்து படையினர் விபத்துக்குள்ளான லாரியை அப்புறப்படுத்தி போக்குவரத்தை சீர் செய்தனர். 

விபத்து குறித்து தொப்பூர் போலீசார் வழக்குப்பதிவு செய்து விசாரணை நடத்தி வருகின்றனர்.

=======