பெண் கவுன்சிலரை வெட்டிய 4 பேர் கைது

திருப்புவனம் யூனியனை சேர்ந்த மடப்புரம் ஊராட்சியில் வடகரை பகுதி உள்ளது. இந்தப்பகுதியில் 2-வது வார்டு ஊராட்சி மன்ற கவுன்சிலராக இருப்பவர் முத்திருளாயி (வயது 50). இவருக்கும் தேர்தலில் தோல்வியுற்ற பாண்டியம்மாள் குடும்பத்திற்கும் முன்விரோதம் இருந்து வந்தது.இந்த நிலையில் நேற்று முன்தினம் இரவு முத்திருளாயி தனது கணவர் ராமலிங்கம் (60) மகன்கள் பரமேஸ்வரன் (33), பரந்தாமன் (29), உறவினர் ராஜலிங்கம் (23) மற்றும் குடும்பத்தினருடன் வீட்டில் அமர்ந்து பேசிக் கொண்டிருந்தார்.
அது சமயம் பாண்டியம்மாள், மகன் ரவி, கணவர் நாகராஜ், ரவியின் மனைவி மல்லிகா, ரவியின் சகோதரர் வேல்பாண்டி உள்பட பலர் சேர்ந்து முத்திருளாயி தரப்பினரை அசிங்கமாகப் பேசியும் வாள், சைக்கிள் செயின், கம்பு போன்ற ஆயுதங்களால் தாக்கியுள்ளனர். இதில் பரந்தாமன், ராமலிங்கம், பரமேஸ்வரன், ராஜலிங்கம் ஆகியோருக்கு தலையில் ரத்தக்காயமும் முத்திருளாயிக்கு மூக்கு, வாயில் ரத்தக்காயமும் ஏற்பட்டுள்ளது. காயம்பட்ட அனைவருக்கும் திருப்புவனம் அரசு மருத்துவமனையில் முதலுதவி சிகிச்சை அளிக்கப்பட்டு மேல் சிகிச்சைக்காக மதுரை அரசு ராஜாஜி மருத்துவமனைக்கு அனுப்பி வைக்கப்பட்டனர்.
இச்சம்பவம் குறித்து பரந்தாமன் கொடுத்த புகாரின் பேரில் திருப்புவனம் போலீஸ் இன்ஸ்பெக்டர் ஏழுமலை எதிர் தரப்பைச் சேர்ந்த 12 பேர் மீது வழக்குப்பதிவு செய்து உள்ளனர். மல்லிகா, வேல்பாண்டி, நாகராஜ், பாண்டியம்மாள் ஆகிய 4 பேரை கைது செய்தனர்.