கொரோனா ஊரடங்கு:சிங்கம்புணரியில் மலைபோல் குவிந்து கிடக்கும் கயிறுகள்

 சிங்கம்புணரி பகுதியில் கயிறு உற்பத்தி மிகவும் பிரபலம் பெற்றது. தென்னை மரங்கள் அதிகம் நிறைந்த கிராமங்கள் சூழ்ந்த சிங்கம்புணரி பகுதியில் அதனைச் சார்ந்த கயிறு உற்பத்தி தொழில் பல ஆண்டுகளாக  நடைபெற்று வருகிறது. தென்னை மரத்திலிருந்து தேங்காயை வெட்டி எடுத்து தேங்காய் நாரிலிருந்து தயாரிக்கப்படுவது மஞ்சிக்கயிறு. இப்பகுதியில் தென்னை நார் கயிறு திரிக்கும் தொழிலில் சுமார் 3 ஆயிரத்துக்கும் மேற்பட்ட தொழிலாளர்கள் வேலை செய்து வருகிறார்கள். இவர்களுக்கு அன்றாட தினக்கூலி தான் வழங்கப்படுகிறது.
கடந்த 2020-ம் ஆண்டு கொரோனா தாக்கத்தால் ஊரடங்கு காரணமாக கயிறு திரிக்கும் தொழில் முடங்கியது. அதை தொடர்ந்து தளர்வுகள் அறிவிக்கப்பட்டதை தொடர்ந்து மீண்டும் தொழில் நடைபெற தொடங்கியது. இந்த நிலையில் தற்போது கொரோனா 2-வது அலை ஊரடங்கு கயிறு திரிக்கும் தொழிலை மிகவும் நசித்து விட்டது. ஏற்கனவே தயார் செய்யப்பட்ட கயிறுகள் மலை போல குவித்து வைக்கப்பட்டு உள்ளது.
திருவிழாக்கள், கட்டிட வேலைகள், விவசாய வேலைகள் சரிவர நடைபெறாததாலும் போக்குவரத்து துண்டிக்கப்பட்டு இருப்பதாலும் கயிறுகள் விற்பனை ஆகாமல் குவிந்து கிடக்கின்றன. இதனால் உற்பத்தியாளர்கள் கவலை அடைந்து உள்ளனர். கயிறு உற்பத்தியாளர்கள் தாங்கள் தென்னை மட்டை வாங்கியதற்கு செலுத்த வேண்டிய தொகையையும், வேலை பார்த்த தொழிலாளர்களுக்கு கூலி தொகை கொடுக்க முடியாமலும் சிரமத்தில் உள்ளனர்.
இது குறித்து கயிறு உற்பத்தியாளர் சீனிவாசன் கூறியதாவது:-
2 தலைமுறைகளாக இந்த தொழில் செய்து வருகிறோம். எங்களுக்கு இந்த தொழில் செய்வதை தவிர வேறு ெதாழில் தெரியாது. கடந்த ஊரடங்கிலும் பாதிக்கப்பட்டோம். ஊரடங்கு தளர்வில் மீண்டும் தொழில் செய்து முன்னேறி விடலாம் என நினைத்தோம். ஆனால் கொரோனா 2-வது அலை ஊரடங்கு என்னை போன்ற தொழில் செய்பவர்களை முடக்கி போட்டு விட்டது. எனவே அரசு எங்களுக்கு அமைப்பு சாரா ெதாழில் வாரியத்தில் சேர்த்து நிவாரணம் வழங்க நடவடிக்கை எடுக்க வேண்டும்.
இவ்வாறு அவர் கூறினார்.