மதுரை,
மதுரை நகரில் கஞ்சா விற்பனையை தடுக்க போலீசார் நடவடிக்கை எடுத்து வருகின்றனர். அதன்பேரில் கீரைத்துறை போலீசார் அந்த பகுதியில் ரோந்து சென்றனர். அப்போது சிந்தாமணி ரோடு, வாழைத்தோப்பு பகுதியில் கஞ்சா விற்பதாக தகவல் வந்தது. உடனே போலீசார் அங்கு விரைந்து சென்ற போது போலீசாரை கண்டதும் வாலிபர் ஒருவர் சைக்கிளில் வேகமாக சென்றார். அவரை பிடித்து விசாரித்தபோது செல்லூர் அருள்தாஸ்புரம் பகுதியை சேர்ந்த ரமேஷ் (வயது 30) என்பதும், அவர் சைக்கிளில் வந்து கஞ்சா விற்றதும் தெரியவந்தது. பின்னர் போலீசார் வழக்குப்பதிவு செய்து அவரை கைது செய்தனர். மேலும் அவரிடம் இருந்து 2 கிலோ 400 கிராம் கஞ்சா, சைக்கிள் ஆகியவற்றை போலீசார் பறிமுதல் செய்தனர்.