முழு ஊரடங்கு அறிவிப்பு: கிருஷ்ணகிரி மாவட்டத்தில் கடைவீதிகளில் பொருட்கள் வாங்க குவிந்த பொதுமக்கள்

ஓசூரில் நேற்று காலை முதலே கடைகளுக்கு மக்கள் படையெடுத்தனர். ஓசூர் காமராஜ் காலனி, ராமநாயக்கன் ஏரிக்கரை மற்றும் முனீஸ்வரர் நகர்  பகுதியிலும் தற்காலிகமாக அமைக்கப்பட்டுள்ள உழவர் சந்தையில் ஒரு வாரத்திற்கு தேவையான காய்கறிகளை மக்கள் வாங்கினர். இதேபோல் எம்.ஜி.ரோடு, நேதாஜி ரோடு தாலுகா அலுவலக சாலை, பாகலூர் ரோடு ஆகிய இடங்களில் உள்ள மளிகை கடைகள் பழக்கடைகளிலும் மக்கள் கூட்டம் அலைமோதியது. இருசக்கர வாகனங்களில் வந்து செல்வோரின் எண்ணிக்கை அதிகளவில் காணப்பட்டதால் போக்குவரத்து நெரிசல் ஏற்பட்டது.  போலீசார், போக்குவரத்தை சீர் செய்யும் பணியில் ஈடுபட்டனர். 

இதனிடையே, ஓசூர் பஸ் நிலையத்தில் இருந்து வெளியூர்களுக்கு அரசு பஸ்கள், தொலைதூர பஸ்கள் இயக்கப்பட்ட போதிலும் குறைந்த எண்ணிக்கையிலேயே மக்கள் பயணம் செய்தனர். இதனால் ஓசூர் பஸ் நிலையத்தில் கூட்டமின்றி வெறிச்சோடி காணப்பட்டது.