வாக்கு எண்ணும் மையத்தில் பணியில் இருந்த தீயணைப்பு வீரர் மயங்கி விழுந்து சாவு
திருவாரூர் அரசு கலைக்கல்லூரி வாக்கு எண்ணும் மையத்தில் பணியில் இருந்த தீயணைப்பு வீரர் கழிவறையில் மயங்கி விழுந்து உயிரிழந்தார்.
திருவாரூர்;
திருவாரூர் அரசு கலைக்கல்லூரி வாக்கு எண்ணும் மையத்தில் பணியில் இருந்த தீயணைப்பு வீரர் கழிவறையில் மயங்கி விழுந்து உயிரிழந்தார்.
வாக்குப்பதிவு எந்திரங்கள்
திருவாரூர் மாவட்டத்தில் உள்ள திருத்துறைப்பூண்டி, மன்னார்குடி, திருவாரூர், நன்னிலம் ஆகிய 4 சட்டசபை தொகுதியில் பதிவான வாக்குகள் அடங்கிய எந்திரங்கள் திருவாரூர் திரு.வி.க அரசு கலைக்கல்லூரி வாக்கு எண்ணிக்கை மையத்தில் பலத்த போலீஸ் பாதுகாப்புடன் வைக்கப்பட்டு உள்ளது.
இந்த வாக்கு எண்ணும் மையத்துக்கு 3 அடுக்கு போலீஸ் பாதுகாப்பு போடப்பட்டுள்ளது. இதன்படி ஓட்டு எந்திரங்கள் வைக்கப்பட்டு உள்ள பாதுகாப்பு அறைக்கு துப்பாக்கி ஏந்திய துணை ராணுவத்தினர், அதனையடுத்து அதிரப்படை பிரிவு போலீசார், இறுதியாக சட்டம்- ஒழுங்கு போலீசார் என 370 போலீசார் சுழற்சி முறையில் 24 மணி நேரமும் பாதுகாப்பு பணியில் ஈடுபட்டு வருகின்றனர்.
தீயணைப்பு வீரர் சாவு
மேலும் அங்கு ஏதேனும் தீ விபத்து நேரிட்டால் அந்த தீ விபத்தை தடுக்க தீயணைப்பு வாகனத்துடன் கூடிய 6 வீரர்கள் பாதுகாப்பு பணியில் ஈடுபடுத்தப்பட்டு உள்ளனர். இந்த நிலையில் நேற்று முன்தினம் இரவு திருமக்கோட்டை தீயணைப்பு நிலையத்தில் பணிபுரியும் மன்னார்குடி மான்கோட்டைநத்தம் பகுதியை சேர்ந்த அற்புதம்(வயது 49) என்ற தீயணைப்பு வீரர் வாக்கு எண்ணும் மையத்தில் பாதுகாப்பு பணியில் ஈடுபட்டு இருந்தார்.
நேற்று காலை 6 மணிக்கு கழிவறைக்கு சென்ற இவர் நீண்ட நேரம் கடந்த பிறகும் திரும்பி வரவில்லை. இதனால் சந்தேகம் அடைந்த சக ஊழியர்கள் கழிவறைக்கு சென்று பார்த்தனர். அப்போது கழிவறைக்குள் மயங்கிய நிலையில் அற்புதம் கிழே கிடந்தார். உடனடியாக அவரை மீட்டு சிகிச்சைக்காக திருவாரூர் அரசு மருத்துவக்கல்லூரி மருத்துவமனைக்கு கொண்டு சென்றனர்.. அங்கு அவரை பரிசோதனை செய்த டாக்டர்கள், அற்புதம் ஏற்கனவே இறந்து விட்டதாக தெரிவித்தனர்.
போலீசார் விசாரணை
இறந்த தீயணைப்பு வீரர் அற்புதத்துக்கு சத்யா என்ற மனைவியும், காருண்யா, யோகாஸ்ரீ ஆகிய 2 மகள்களும் உள்ளனர்.
இதுகுறித்து திருவாரூர் தாலுகா போலீசார் வழக்குப்பதிவு செய்து அற்புதம் எப்படி இறந்தார்? என விசாரணை நடத்தி வருகிறார்கள்.
வாக்குச்சாவடி மையத்தில் பாதுகாப்பு பணியில் இருந்த தீயணைப்பு வீரர் மயங்கி விழுந்து உயிரிழந்த சம்பவம் திருவாரூர் பகுதியில் பெரும் பரபரப்பை ஏற்படுத்தி உள்ளது.