காட்டெருமை தாக்கி மூதாட்டி படுகாயம்
காட்டெருமை தாக்கி மூதாட்டி படுகாயம் அடைந்தார்.
ஊட்டி,
ஊட்டி அருகே கேத்தி கோலணிமட்டம் பகுதியை சேர்ந்தவர் மீனாட்சி(வயது 68). இவர் அதே பகுதியில் உள்ள சாலையில் நடந்து சென்றார். அப்போது அங்கு வந்த காட்டெருமை ஒன்று திடீரென அவரை தாக்கியது. இதில் அவர் தூக்கி வீசப்பட்டு படுகாயம் அடைந்தார்.
அவரது அலறல் சத்தம் கேட்டு அக்கம்பக்கத்தினர் விரைந்து வந்து காட்டெருமையை விரட்டியடித்தனர். பின்னர் மீனாட்சியை மீட்டு ஊட்டி அரசு ஆஸ்பத்திரிக்கு அனுப்பி வைத்தனர். பின்னர் மேல்சிகிச்சைக்காக கோவை அரசு ஆஸ்பத்திரிக்கு அனுப்பி வைக்கப்பட்டார்.
அங்கு அவருக்கு தீவிர சிகிச்சை அளிக்கப்பட்டு வருகிறது. இதுகுறித்து குந்தா வனச்சரகர் சரவணகுமார் தலைமையிலான வனத்துறையினர் விசாரணை நடத்தி வருகின்றனர்.